Partia Demokratike ka denoncuar sërish tenderin prej 500 mijë dollarësh të kreut të Fondit Shqiptar të Zhvillimit, Dritan Agolli i cili është vënë nën hetim nga SPAK.
Në një deklaratë nga selia blu, deputetja Dhurata Çupi u shpreh se në vend që qeveria dhe FSHZH të fokusoheshin tek ndërtimi i infrastrukturës, furnizimi me ujë të pijshëm, energji të pandërprerë, dhe pastrimi, përkundrazi vëmendja ishte tek krijimi i një menyje imagjinare se çfarë duhej të servirej për të ngrënë në këto fshatra!
“Programi i 100 fshatrave turistikë”, një projekt i trumbetuar nga Edi Rama, i cili startoi më 2018 e duhet të përmbyllej më 2020, si çdo premtin tjetër i pambajtur i kësaj qeverie tregoi se ishte vetëm për propagandë. Përmes këtij projekti do të investohej ne infrastrukturë, ekonomi, investime në agroturizëm, rikonstruksion, monumente etj, por këto ide kanë mbetur në letër. Përveç tabelave të rrugëve që kushedi sa para janë paguar për to, në shumicën dërrmuese të fshatrave nuk ka pasur asnjë ndërhyrje. Rrugët janë të amortizuara dhe institucione kulturore nuk ka”, tha deputetja e PD.
Çupi ka publikuar pamjet nga rrugët e tre fshatrave që janë afër qendrës së se kryeqytetit, ku sipas saj nuk ka asnjë investim të ri, ndërsa inkurajoi SPAK të çojë para drejtësisë çdo abuzues të taksave të shqiptarëve.
Pak ditë më parë SPAK nisi verifikimet për Kreun e Fondit Shqiptar të Zhvillimit, Dritan Agollin, për tenderin prej 500 mijë dollarësh dhënë kuzhinierit që punon me djalin e tij për një meny për projektin e 100 fshatrave.
Discussion about this post