Presidenti i Skënderbeut, Ardjan Takaj, prezantoi këtë të martë trajnerin e ri, Ernest Gjoka,i cili pason në këtë detyrë tranerin serb, Ivan Gvozdenovic, i larguar pak ditë më parë për shkak të rezultateve të dobëta.
Takaj zbuloi se është firmosur një kontratë për një vit e gjysmë, ndërsa shtoi se ka besim se Gjoka do të ndihmojë skuadrën, por edhe veten e tij.
Sipas tij, Skënderbeu nuk është futur në Superiore vetëm për të marrë pjesë, por ka objektiva realë.
“Ky është vendimi i klubit, që për 1 vit e gjysmë këtë klub ta drejtojë Ernest Gjoka. Besoj e dini dhe vetë se ka përvojë shumë të madhe në Superligë, ka dhe eksperienca jashtë Shqipërisë, besoj me punën, me profesionalizmin, do na ndihmojë dhe neve dhe veten e tij, për të pasur rezultate për pretendimet që ka klubi ynë.
Nuk heq dorë nga pretendimet, nuk kemi ardhur në Superiore vetëm për të marrë pjesë. Që nga fillimi i sezonit kemi pasur pretendimet, kemi skuadrën, njohim cilësitë e Superiores dhe çfarë cilësie kemi vetë, nuk kemi pretendime në ajër, por reale”, deklaroi Takaj.
Discussion about this post