Shqipëria ka fituar ndeshjen e parë të Ligës së Kombeve, duke mundur me rezultatin 1-2 Ukrainën në “Epet Arena” të Pragës.
Sfida nisi me kuqezinjtë kërkues, të cilët iu afruan disa herë golit me Laçin, Asanin dhe Asllanin, por fati nuk ishte me ta.
Gjithsesi goli i parë erdhi në fillimin e pjesës së dytë, me ukrainasit që kaluan në avantazh falë Konoplyas në minutën e 49’. Por festa e tyre zgjati vetëm pesë minuta, pasi në të 54’-ën, ishte Ardian Ismajli që barazoi sfidën.
Të besuarit e Sylvinhos ishin sërish kërkues dhe pas një aksioni fantastik në minutën e 66’, ishte Jasir Asani ai që e finalizoi siç duhej për të përmbysur rezultatin.
Rastet ishin sërish aty për kuqezinjtë për të shënuar dhe golin e tretë me Manajn dhe Hoxhën, por pa mundur të tundnin rrjetën.
Kështu Shqipëria merr tre pikë në ndeshjen e parë të Ligës së Kombeve në Grupin B1. Takimi i radhës për kuqezinjtë do të jetë në 10 shtator, pra 20:45 në “Air Albania” kundër Gjeorgjisë, e cila gjithashtu mori tre pikë në sfidën e parë pas fitores 4-1 me Republikën Çeke.
REZULTATI:
UKRAINË 1-2 SHQIPËRI
Konoplya 49′ / Ismajli 54′, Asani 66′
90+4′ Mbyllet sfida me fitoren 1-2 të Shqipërisë!
90+2′ Manaj provon me një predhë nga goditja e dënimit, por topi shkon jashtë.
90′ Akordohen 3 minuta shtesë.
88′ Hoxha tenton me një gjuajtje nga distanca, me topin që shkon mbi kuadrat.
83′ Manaj provon me një gjuajtje me kokë, por topi shkon jashtë kuadratit.
81′ Dy zëvendësime te Ukraina. Largohen Brazhko dhe Tsygankov. Në vendet e tyre futen Malinovskyi dhe Zinchenko.
77′ Zëvendësim te Shqipëria. Largohet Bajrami dhe në vendin e tij futet Arbër Hoxha.
73′ Zëvendësim te Shqipëria. Largohet Laçi dhe në vendin e tij futet Medon Berisha.
72′ Tre zëvendësime te Ukraina. Largohen Sudakov, Kabaiev dhe Shaparenko, në vendet e tyre futen Yarmolenko, Pikhalonok dhe Vanat.
67′ Asani shkakton një ndërhyrje të gabuar dhe ndëshkohet me karton të verdhë.
66′ GOOOL SHQIPËRI 1-2/ Manaj hedh një top në zonë me Laçin që e lë për Asanin dhe ky i fundit me të majtën e çon në rrjetë. (VIDEO)
65′ Sudakov godet nga distanca, me topin që shkon jashtë kuadratit.
62′ Ismajli provon me një gjuajtje me kokë, por topi kësaj radhe ndalet nga Trubin.
54′ GOOOL SHQIPËRIA 1-1/ Ismajli gjen topin në zonë pas një këndoreje dhe me të djathtën e çon drejt rrjetës. (VIDEO)
53′ Manaj provon me një gjuajtje nga distanca, por Trubin ndërhyn në mënyrën e duhur.
49′ GOL UKRAINA 1-0/ Konoplya godet me të parën dhe ndëshkon Strakoshën. (VIDEO)
46′ Nis pjesa e dytë!
45+1′ Mbyllet pjesa e parë e takimit!
45′ Akordohet 1 minutë shtesë.
44′ Brazhko godet me kokë, me topin që shkon shumë pranë kuadratit.
42′ Yaremchuk godet me të majtën brenda zonës, por Strakosha ndërhyn si duhet për t’i mohuar golin.
40′ Laçi bën një lëvizje mjaft të bukur me një gjuajtje me thembër, por topi tund vetëm rrjetën e jashtme.
39′ Asllani lëshon një predhë brenda zonës, me topin që ndalet nga Trubin.
31′ Asani merr një krosim në zonë dhe godet me kokë, me topin që nuk shkon në kuadrat.
20′ Asllani hedh një krosim të rrezikshëm drejt zonës, por Laçi dhe Manaj nuk merren vesh mirë me njëri-tjetrin dhe rreziku largohet nga zona.
19′ Tsygankov hedh një krosim drejt zonës, por topi shkon shumë larg kuadratit.
9′ Laçi merr një top në zonë nga Mitaj dhe godet me të majtën, por tentativa e tij shkon shumë pranë kuadratit.
gijotina.com/
Discussion about this post