Suarez i shpëton në sekondën e fundit, Uruguai fiton vendin e tretë në Kupën e Amerikës

Uruguai ka zënë vendin e tretë në Kupën e Amerikës, falë një fitore pas ekzekutimit të penalltive ndaj Kanadasë pasi koha e rregullt përfundoi baras 2-2.

Rodrigo Bentacur shënoi i pari në minutën e tetë, por kanadezët shënuan me Ismael Kone në të 22-ën për të barazuar shifrat në 1-1.

Ishte minuta e 80-të kur Jonathan David realizoi për 2-1 dhe në fund mendohej se Kanada do ta fitonte vendin e tretë.

Por në skenë doli veterani uruguaian Luis Suarez që realizoi gol në frymën e fundit 90+2 duke i siguruar barazimin Uruguait dhe ekzekutimin e penalltive.

Në penallti Uruguai ishte më i mirë duke fituar me rezultat 3-4, derisa për kanadezët dështuan nga pika e bardhë Ismael Kone dhe Alphonsy Davies.

Ndërkohë në finalen e madhe të Kupës së Amerikës do të luajnë Argjentina dhe Kolumbia, që do të zhvillohet në 02:00 pas mesnatës së sotme.