Egnatia ka mposhtur Skënderbeun me rezultatin 1-0 në stadiumin “Arena Egnatia”.
Goli i Regi Lushkjes me penallti në fillimin e pjesës së dytë mjaftoi për 3 pikët te rrogozhinasit, që marrin kreun e tabelës me 30 pikë pas 17 javësh. Kujtojmë se Partizani ka ndeshje të prapambetur dhe ndjek me një pikë më pak.
VAR ishte vendimtar në këtë takim, pasi thirri kryesorin Lata për të rishikuar rastin e akorduar më pas 11-metërsh. Skënderbeu u detyrua më pas të luajë me një lojtar më pak, pasi Doka doli me karton të kuq në minutën e 60-të.
Korçarët mbajnë aktualisht vendin e parafundit me 14 pikë, një më shumë se Bylisi i vendit të fundit.
Në ndeshjen tjetër të kësaj të diele, Laçi dhe Dinamo kanë ndarë pikët, në një barazim pa gola, por që erdhi në një sfidë të mbushur me emocione deri në fundin e saj.
Sfida ishte e hapur, me kurbinasit vendas të cilët kishin më shumë iniciativën, por me blutë të cilët krijuan rastet më të pastra. Mundësinë më të mirë për të shënuar e kishte Laçi, por Melo shpërdoroi penallti në pjesën e dytë, i ndaluar nga pritja e Salit. Ndërsa të vetën e bëri edhe terreni i rënduar nga shirat, me topin që shpesh ngecte në ujë duke krijuar vështirësi për mbrojtës e sulmues, të cilët shihnin goditjet e tyre të ndaleshin në llucë.
Në fund, skuadrat morën nga një pikë që nuk u shërben shumë për klasifikimin, pasi nuk i lejon të bëjnë hapa të rëndësishëm para në krahasim me objektivat që kanë në këtë sezon.
Discussion about this post