Atalanta-Real Madrid, është një nga ndeshjet më të rëndësishme të kësaj mbrëmje në Ligën e Kampioneve.
Italianët vijnë si një nga ekipet më në formë të momentit, ndërsa madrilenët të uritur për pikë.
Në prag të kësaj përballje, trajneri i Realit, Carlo Ancelotti, pranoi se do të jetë një ndeshje shumë e vështirë, ndërsa shtoi se në këtë fazë ku ndodhet ekipi, janë shumë të rëndësishme pikët.
“Ata kanë qenë ekip shumë i mirë prej kohësh. Këtë sezon janë akoma dhe më të fortë. Vijmë nga një moment i vështirë, por jemi Real Madrid. Me Gasperinin, jemi miq të mirë. Ai ishte trajner i ekipit të të rinjve te Juventusi, kur unë isha atje. Po bën një punë fantastike. Çdo sezon i ndryshohen lojtarët, por ai di si të përshtatet. Do të jetë një ndeshje intensive dhe e bukur.
Unë kam besim tek ekipi dhe lojtarët e mi. Ne jemi përmirësuar. Pres një ndeshje shumë të vështirë në Itali. Ne do të luajmë për të marrë tre pikët, për të synuar më pas kualifikimin. Do të jetë e vështirë për të siguruar një nga tetë vendet e para, por luajmë vetëm për të marrë tre pikët”, deklaroi Ancelotti.
Në krahun tjetër, trajneri i Atalantës, Gasperini, deklaroi se në Bergamo kjo përballje pritet me entuziazëm të madh.
“Është një ndeshje që e presim me entuziazëm të madh në Bergamo. Do të përballemi me klubin më të suksesshëm në botë. Duhet të jemi të kujdesshëm në fushë. Kanë lojtarë të mirë dhe padyshim një trajner si Ancelotti në stol. Për të marrë një rezultat, duhet shumë përqendrim. Ne jemi me këmbë në tokë”, u shpreh Gasperini.
Ndeshja Atalanta-Real Madrid, do të luhet mbrëmjen e kësaj të marte, duke nisur nga ora 21:00.
Discussion about this post