Tarifat e arsimit të lartë në vendin tonë janë shumë të larta dhe çdo vit shtohet nga një pagesë shtesë, përveç transportit apo akomodimit që pas pandemisë kanë kapërcyer në “stratosferë”. Duke qenë se pagat janë të ulëta dhe punësimi i dobët, përballimi i shpenzimeve për t’u arsimuar po bëhet i pamundur për studentët. Për këtë arsye, iniciativë të organizatës “Lëvizja për Universitetin”, studentët e Tiranës kanë nisur sot një peticion përmes të cilit kërkojnë që të hiqet tarifa për listën e notave. Përmes një deklarate për mediet ata shprehen se, paguajnë tarifat më të larta në rajon për universitetin dhe marrin shërbimet më të dobëta. Ata tregojnë se duhet të paguajnë për fletën në të cilën printohet lista, për vulën dhe gjithashtu këstin e shërbimit në bankë që shkon rreth 100 lekë. Studentët evidentojnë se tarifa për listën e notave është e padrejtë logjikisht dhe ligjërisht, prandaj duhet të hiqet.
“Tarifa për listën e notave është shumëfishë e padrejtë. Ne paguajmë tarifat më të larta në rajon, por edhe më gjerë për shkollimin e lartë .Pavarësisht kësaj, si pasojë e Ligjit për Arsimin e Lartë të cilin e kemi kundërshtuar në krye të herës, fakultetet detyrohen të ndërtojnë logjikën e tyre të organizimit në funksion të sigurimit të parave, të cilat shteti i jep me pikatore për universitetet publike. Për pasojë fakultetet kërkojnë nga studentët një tarifë shtesë për t’u pajisur me një listë notash. Edhe brenda logjikës ekonomiste tarifa për këtë dokument është jashtëzakonisht e padrejtë, sepse kostoja e një flete të printuar dhe të vulosur është larg vlerës të cilën fakultetet na detyrojnë të paguajmë, pale që pagesa e një tarife të tillë është edhe në parim e padrejtë. Sikur kjo të mos mjaftonte, për t’u pajisur me këtë dokument, studentët detyrohen të paguajnë edhe 100 lekë tarifën e shërbimit të bankës”, shprehen ata.
Në përfundim shprehen se vendosja e tarifave shtesë është abuzive dhe studentët duhet të bashkohen për t’i dhënë fund vjedhjes ndaj tyre dhe mbushjes së xhepave të oligarkëve. Ata tregojnë se, peticioni është ngritur në Fakultetin e Shkencave, por bëjnë thirrje që të bashkohen të gjithë fakultetet. “Kësaj padrejtësia dhe zhvatjeje duhet t’i vije fundi sa më shpejtë. Prandaj, aktivistët e Lëvizjes Për Universitetin kanë nisur një peticion në Fakultetin e Shkencave Sociale për heqjen e kësaj tarife. Le ta firmosim të gjithë, për t’i paraprirë organizimit në vazhdim deri në heqjen e çdo tarife zhvatëse”, shprehen ata, ndërsa theksojnë se nuk dorëzohen derisa qeveria të heq këtë tarifë dhe të tjera pagesa të panevojshme.
Discussion about this post