Sekretari i Përgjithshëm i PS-së, Blendi Klosi, tha se mazhoranca nuk është kundër komisioneve hetimore, por opozita nuk ka një indicie për kërkesën e saj.
Klosi tha se tensionet në Kuvend nuk kanë lidhje me komisionet hetimore, pasi kjo është një çështje e vjetër, por ka lidhje me hetimet e SPAK ndaj ish-Kryeministrit Sali Berisha dhe familjarëve të tij.
Deputeti socialist tha se opozita nuk ka paraqitur shkaqet e nevojshme për ngritjen e komisioneve hetimore.
“Ne miratuam ngritjen e Komisionit Hetimor për inceneratorët. Shkoi Kryeministri, ministra, zyrtarë të tjerë, të cilët u thirrën për të dëshmuar. Pra ne nuk jemi kundër komisioneve hetimore, por opozita nuk ka asnjë indicie për të kërkuar ngritje komisionesh. Mendoj se problemin e kanë me objektin në kërkesën e tyre, pasi nuk kanë objekt, thjesht duan komisione”, tha Klosi në emisionin “Kjo Javë”.
Klosi tha se opozitës i mungon mbështetja popullore, ndaj dhe deputetët e opozitës merren me veprime fëminore si ajo e përmbysjes së karrigeve apo ndezja e flakadanëve. “Ja i ndezën flakadanët, ja i përmbysën edhe karriget duke menduar se ne nuk do votojmë, po pastaj? Janë veprime fëminore që ndërmerren pasi nuk kanë mbështetje popullore”, tha Klosi. Ai akuzoi opozitën se ka frikë nga debati parlamentar, pasi tani që diskutohet projekt buxheti ajo duhej të angazhohej në debatin pikërisht për buxhetin.
Klosi tha se opozitës nuk i intereson një Parlament që funksionon, pasi nëse do e donin, do uleshin në dialog me ne dhe të thonin: duam këtë komision, kemi këto kushte, etj etj.
“Parlamenti nuk është në kaos, thjesht kemi një konflikt që po e krijon një forcë e caktuar. Iu intereson kjo situatë”, tha Klosi.
Discussion about this post