Detaje të reja kanë dalë nga tentativa për të grabitur miliona në një banke në Tiranë. Kjo skemë kaq e ngjashme me filmat aksion u zbulua nga asistentja e drejtoreshës së filialit. Asistentja me inicialet E.P, iu shpjegoi hetuesve se ishte ajo bashkë me një koleg ishin përgjegjësit për hapjen dhe mbylljen e filialit. Më datë 18 shkurt 2022, ditë e premte, punonjësja ka shpjeguar se bankën e kanë mbyllur në orën 18:20 dhe nuk kanë konstatuar asnjë problem. Tri ditë më vonë, të hënën e 21 shkurtit, ajo është paraqitur në punë në orën 08.20 të mëngjesit, ka hapur filialin dhe pas mbërritjes së punonjësve të tjerë, bashkë me një kolege kanë hapur edhe ambientet e thesarit.
Një orë me vonë, asistentja e drejtoreshës, shpjegon se konstatoi probleme, duke gjetur pllakën e thyer dhe vrimat. “Një orë pas hapjes së filialit zbrita në kuzhinë që të merrja një gotë ujë. Teksa kthehesha, rastësisht ktheva kokën nga arshiva dhe pashë një pllakë dyshemeje, që dukej e thyer. U afrova dhe pashë nga afër. Kuptova që pllaka ishte hequr. Në moment ndeza ditën e telefonit dhe tek vendi ku ishte hequr pllaka pashë gjashtë vrima të cilat ishin pak më të mëdha sesa madhësia e stilolapsit. Shumën nuk e di, pasi këtë informacion e ka vetëm Thesari Qendror”, shpjegon punonjësja e bankës.
Në moment, gruaja shpjegon se njoftoi përgjegjësin e sigurisë për të gjithë objektin si dhe punonjësin e sigurisë së thesarit e më pas është njoftuar ai i sigurisë. Më 22 shkurt 2022 u tentua që të grabitej banka e nivelit të dytë në Tiranë, në bulevardin ‘Zogu I’. Persona ende të paidentifikuar gërmuan disa ditë me radhë për grabitjen e bankës pranë Ministrisë së Drejtësisë, aty ku u gjet edhe një armë zjarri. Autorët të cilët janë shpallur në kërkim, kishin nisur gërmimin në kanalet e ujerave të zeza duke hapur një tunel 200-300 metra të gjatë, për të arritur futjen brenda bankës.
Discussion about this post