Tentoi të vrasë bashkëfshatarin në Fier, arrestohet pas 3 vitesh autori (Emri)

Policia ka arrestuar një 47 vjeçar banues në fshatin Sulaj, Fier.

Ai ishte shpallur në kërkim dhe qëndronte në arrati prej tre vitesh.

Gjykata e Fierit i kishte caktuar masën e sigurisë  “Arrest me burg”, në mungesë për veprat penale “Vrasje me paramendim”, e mbetur në tentativë, në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.

Sikurse thotë policia,  i arrestuari Robert Merrnica në vitin 2021 ka tentuar të vrasë me armë zjarri një person tjetër në fshatin Sulaj.

Njoftimi i policisë

Finalizohet nga Komisariati i Policisë Fier operacioni i koduar “Tentativa”.

Në kuadër të operacionit u vu në pranga shtetasi i shpallur në kërkim Robert Merrnica, 47 vjeç, banues në fshatin Sulaj, Fier.

Shërbimet e Komisariatit të Policisë Fier pas informacioneve të siguruara në rrugë operative në afërsi të fshatit Sulaj, kapën dhe vunë në pranga shtetasin Robert Merrnica, 47 vjeç, banues në fshatin Sulaj, pasi ndaj tij Gjykata e Fierit ka caktuar masë sigurie “Arrest me burg”, për veprat penale “Vrasje me paramendim”, e mbetur në tentativë, në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.

Ky shtetas në vitin 2021 ka tentuar të vrasë me armë zjarri shtetasin P. P., në fshatin Sulaj, Fier.

Në vijim të veprimeve procedurale Sektori për Hetimin e Krimeve të Rënda të DVP Fier arrestoi shtetasin R. M.

Materialet procedurale i kaluan Prokurorisë për veprime të mëtejshme.