Skuadra e Tiranës kërkon përmbysjen e madhe ndaj Dinamos në sfidën që zhvillohet këtë të enjte në stadiumin “Air Albania” duke nisur nga ora 19:45. Bardheblutë kërkojnë të kualifikohen në turin tjetër të kupës së Shqipërisë teksa kanë një mision aspak të lehtë pasi duhet të shënojnë tre gola për të kaluar më tej.
Drejtuesit e klubit kryeqytetas kanë marrë vendimin për të përgjysmuar çmimet e biletave për këtë sfidë shumë të rëndësishme dhe vendimtare për rrugëtimin në turneun e dytë më të rëndësishëm futbollistik në Shqipëri.
Tirana si skuadër pritëse kërkon që numri i tifozëve të jetë sa më i lartë në këtë teksa klubi ka marrë vendimin tjetër po aq të rëndësishëm për uljen e çmimit të biletave për të gjithë sezonin. Bardheblutë janë skuadra që gëzojnë më shumë popullaritet në shkallët e stadiumit duke lënë pas ekipe të tjera elitare si Partizani, Dinamo apo Vllaznia.
Discussion about this post