Italisë i duhet një ‘mrekulli’ për të bindur Pep Guardiolën

Italia nuk e ka humbur shpresën për të ulur në pankinën e kombëtares një nga trajnerët më të mëdhenj të historisë, Pep Guardiolën.

Megjithatë, sipas mediave italiane, bindja e teknikut spanjoll duket një mision pothuajse i pamundur.

Sipas “Football Italia”, drejtori teknik Paolo Maldini dhe këshilltari Leonardo udhëtuan drejt Barcelonës, ku zhvilluan një takim kokë më kokë me Guardiolën për t’i prezantuar projektin e Federatës Italiane të Futbollit.

Ish-trajneri i Manchester City mbetet objektivi kryesor për të marrë drejtimin e “Azzurrëve”.

Megjithatë, eksperti i merkatos Fabrizio Romano ka zbehur ndjeshëm optimizmin.

Sipas tij, Guardiola nuk ka ndërmend të rikthehet menjëherë në pankinë, pasi dëshiron të marrë një periudhë pushimi dhe t’i kushtojë më shumë kohë familjes.

“Pep planifikon të pushojë nga futbolli për një kohë. Nëse Italia arrin ta bindë të ndryshojë mendje, do të ishte një mrekulli dhe një kryevepër”, u shpreh Romano.

Për këtë arsye, Federata Italiane po punon paralelisht edhe me alternativa të tjera.

Andrea Pirlo dhe Roberto Mancini konsiderohen kandidatët kryesorë në rast se Guardiola refuzon përfundimisht ofertën.

Mancini është njeriu që i dhuroi Italisë triumfin në Euro 2020, ndërsa Pirlo vazhdon të gëzojë vlerësim të madh në futbollin italian.

Megjithatë, ëndrra e madhe e “Azzurrëve” mbetet Guardiola, edhe pse për ta bërë realitet nevojitet diçka më shumë se një ofertë bindëse.