Gjykata e Apelit ka vendosur lënien në fuqi vendimin për pezullimin nga puna të tre punonjësve të Ujësjellësit të Krujës. Ata akuzohen se kanë shpërdoruar detyrën, ku si pasojë në këtë qytet u krijua një situatë kaotike për disa ditë me radhë, pasi shumë qytetarë u helmuan nga përdorimi i ujit të pijshëm. Tre punonjësit e pezulluar Ervin Karafili, shefi i shërbimit të epidemilogjisë dhe higjienës në Krujë; Ledio Çela, administrator i Ndërmarrjes së Ujësjellës Kanalizimeve në Krujë dhe Andi Kupa, drejtues teknik.. Mbi ta rëndon vepra penale “shpërdorim i detyrës”, pasi sipas Apelit ata janë përgjegjës për ndotjen e ujit të pijshëm.
Në një reagim zyrtar Ujësjellësi i Krujës, deklaroi se shkak paraprak për helmimin e banorëve, është kontaminimi i ujit të pijshëm si pasojë e reshjeve të dendura të shiut të shtunën dhe të dielën, veçanërisht në vendburimin e Malësisë së Krujës ku është konstatuar prezencë e amoniakut mbi normë. Si pasojë e kësaj ndotjeje mbi 600 qytetarë u paraqitën në spital me simptoma helmimi, mes tyre dhe fëmijë, gjatë javës së fundit të tetorit.
Analizat e Institutit të Shëndetit Publik treguan se helmimi ishte shkaktuar nga një bakter si pasojë e përzierjes së ujit të pijshëm me ujëra të zeza.
Nëndrejtori i ISHP-së, Dritan Ulqinaku ditën kur informoi mbi rezultatin bëri përgjegjës ujësjellësin e Krujës për atë që quajti epidemi hidrike.
“Duhet të kishin qenë më shumë të kujdesshëm.”- u shpreh ai.
Ujësjellësi i ri i Krujës, kushtoi 376 milionë lekë dhe u inaugurua vetëm një muaj para zgjedhjeve te 25 prillit nga kryeministri Rama.
Discussion about this post