Për herë të parë në histori, obeziteti tek fëmijët ka tejkaluar nënpeshën në të gjithë botën, sipas një raporti të fundit të UNICEF. Sot, 1 në 10 fëmijë të moshës 5 deri në 19 vjeç, jetojnë me obezitet, duke u përballur me rreziqe serioze për shëndetin si diabeti i tipit 2, sëmundjet kardiovaskulare dhe disa lloje kanceri.
“Kur flasim për kequshqyerjen, nuk flasim më vetëm për fëmijët nën peshë. Obeziteti është një shqetësim në rritje që mund të ndikojë në shëndetin dhe zhvillimin e fëmijëve. Ushqimet ultra të përpunuara po zëvendësojnë gjithnjë e më shumë frutat, perimet dhe proteinat në një kohë kur ushqyerja luan një rol kritik në rritjen, zhvillimin konjitiv dhe shëndetin mendor të fëmijëve”, tha Drejtoresha Ekzekutive e UNICEF-it, Catherine Russell.
Që nga viti 2000, mbipesha është rritur trefish, ndërsa nënpesha ka pësuar rënie. Problemi është më i theksuar në rajone si Ishujt e Paqësorit, por as vendet me të ardhura të larta si SHBA, Kili dhe Emiratet e Bashkuara Arabe nuk janë të përjashtuara.
UNICEF fajëson rritjen e konsumit të ushqimeve ultra të përpunuara, marketingun agresiv dhe mungesën e politikave mbrojtëse për ushqimin e fëmijëve. Raporti paralajmëron se deri në vitin 2035, kostoja ekonomike globale e obezitetit mund të arrijë 4 trilionë dollarë në vit.
UNICEF i bën thirrje qeverive të marrin masa të forta për të mbrojtur fëmijët, etiketim të qartë të ushqimeve, ndalime të marketingut të dëmshëm, taksa mbi produktet e pashëndetshme, dhe mbështetje sociale për familjet.
“Obeziteti nuk është më një problem vetëm për vendet e pasura. Është një krizë globale që kërkon veprim urgjent. Ushqim i shëndetshëm dhe i përballueshëm duhet të jetë i disponueshëm për çdo fëmijë për të mbështetur rritjen dhe zhvillimin e tij . Ne kemi nevojë urgjente për politika që mbështesin prindërit dhe kujdestarët për të pasur akses në ushqime të shëndetshme për fëmijët e tyre”, theksoi Russell.
Discussion about this post