Vajza e Frederik Radit, i cili u ekzektua me breshëri plumbash në Gusht të vitit të kaluar, i është drejtuar me një denoncim Sali Berishës, ku pretendon se autoritetet policore po fshehin autorin e vrasjes së babait të saj.
Ajo thotë se prej ditës së vrasjes, Policia e Lezhës, Policia e Rrëshenit dhe Prokuroria janë në dijeni të plotë se kush janë autorët, por nuk është marrë asnjë masë ligjore. Vajza e viktimës thotë se kanë arsye të forta të besojnë se palë të fuqishme kanë ndërhyrë në hetim dhe po mbrojnë vrasësit dhe se nga drejtësia ka marrë vetëm heshtje.
Kujtojmë se 68-vjeçari Frederik Radi u gjet i vrarë me armë zjarri nga vajza e tij Leonora Radi brenda banesës së tij në fshatin Lajthize të Njësisë Administrative të Oroshit në Mirditë. Frederik Radi jetonte në një fshat të Kurbinit, por po kalonte muajt e verës i vetëm pranë banesës së vjetër në vendlindje. Nga hetimet dyshohet se ai ishte qëlluar me breshëri automatiku nga dritarja e dhomës.
Postimi i plotë i Berishës:
I vrasin në gjumë babain, policia fsheh autorin!
Lexoni denoncimin e vajzës së viktimës, dënoj me forcën më të madhe fshehjen e vrasjes të babait të saj!
Përshëndetje z. Berisha,
Po ju drejtohem me shumë dhimbje, por edhe me shpresën e fundit që më ka mbetur, sepse prej institucioneve të drejtësisë kam marrë vetëm heshtje dhe padrejtësi.
Babai im, Frederik Radi, është vrarë në gjumë, në mënyrë të pabesë dhe mizore, më 20 gusht 2024, në shtëpinë e tij në Lajthizë, Mirditë. Prej asaj dite, pavarësisht se Policia e Lezhës, Policia e Rrëshenit dhe Prokuroria janë në dijeni të plotë kush janë autorët, nuk është marrë asnjë masë ligjore. Të gjithë heshtin.
Ne kemi arsye të forta të besojmë se palë të fuqishme kanë ndërhyrë në hetim dhe po mbrojnë vrasësit. Kjo është një padrejtësi e tmerrshme, dhe shteti po tregohet i pafuqishëm – ose i kapur.
Zoti Berisha, ju jeni zëri i vetëm që arrin të çojë të vërtetën në dritën e opinionit publik. Ju lutem, ju bëj thirrje si qytetare dhe si e bija i një njeriu të pafajshëm që është vrarë mizorisht: ndihmoni që kjo çështje të bëhet publike! Ndihmoni që të ushtrohet presion publik mbi institucionet që kanë zgjedhur të heshtin.
Pa ndihmën tuaj dhe pa jehonë mediatike, kjo vrasje do të mbulohet me pluhur dhe kriminelët do të vazhdojnë të ecin të lirë. Mos lejoni që drejtësia të vdesë bashkë me viktimën!
Discussion about this post