Pas ngjarjes tragjike ku një 12-vjeçar nga Pocesta e Maliqit humbi jetën nga arresti kardiak në QSUT, ka reaguar dhe spitali rajonal i Korçës, ku i mituri ishte ishte dërguar fillimisht për t’u trajtuar. Mjekët kanë dhënë një sqarim lidhur me trajtimin mjekësor që i është bërë të miturit. Spitali ka theksuar se, pas një stabilizimi të shëndetit më 31 dhjetor, dhe në përputhje me dëshirën e familjarëve, fëmija u largua nga spitali.
“Gjatë shtrimit ai është mjekuar me antibiotik, perfuzione dhe ilaçe për barkun. I gjithë mjekimi është bërë mbi rezultatet e analizave. Në datën 7 Janar, kur 12-vjeçari është paraqitur sërish në urgjencën spitalore të Korçës “është bërë stabilizimi i gjendjes shëndetësore edhe pse u paraqit në situate shumë të rënduar në spital”, njoftojnë bluzat e bardha.
Spitali rajonal i Korçës sqaron se i mituri u transportua në Tiranë për mjekim të specializuar dhe për ekzaminime të thelluara shëndetësore,për shkak të simptomave të cilat ishin të njëjta për disa diagnoza. Mjekët deklarojnë se rasti është trajtuar me përparësi nga personeli shëndetësor, megjithatë, në spitalin e Korçës nuk ka një mjek kardiopediatër, që mund të kishte ndihmuar më tej në këtë rast. Ndërkohë, Prokuroria e Korçës ka nisur hetimet për të zbardhur shkaqet e ngjarjes dhe për të përcaktuar përgjegjësitë në lidhje me humbjen tragjike të jetës së fëmijës.
Discussion about this post