Gijotina. com ka denoncuar më herët se si kryebashkiaku i Tiranës, Erion Veliaj, shfrytëzonte fondet e qytetarëve për të bërë propagandë për fushatë. Një rast i tillë ishte i parave që u derdhën për t’u “rregulluar” lagja e VIP-ave tek “Kodra e Diellit” në Tiranë.
Lali Eri hodhi 2.6 miliardë lekë sikur lagja e tyre do të rindërtohej nga e para, kur është në gjendje të mirë dhe rrethuar nga luksi. Sipas dokumentit, tani Veliaj do t’u përmirësojë linjat elektrike, atë të ujësjellësit dhe gjelbërimin. Ndërkohë, në lagjet e qytetarëve nuk ka as ujë të pijshëm dhe pranë pallateve gjen vetëm mbeturina.
Përveç këtij luksi të shfrenuar që po i fal Lali VIP-ave, tenderi është dhënë pa garë tek firma “PE – VLA – KU” shpk, në pronësi të Vladimir Pjetërgjokajt.
Ankesa
Lali Eri e ka skuqur tenderin me shkelje. Tani tenderi ka përfunduar në Komisionin e Prokurimeve Publike. Më datë 15 prill firma “Curri shpk” ka dorëzuar një ankesë kundër këtij prokurimi dhe KPP është kujtuar të japë vendimin më 15 maj, një ditë pas zgjedhjeve, për të mos cenuar fushatën e Lali Erit.
Është e pamundur që të mbrohet Bashkia Tiranë pasi paratë i jabë dhënë kompanisë me ofertën më të shtrenjtë, por KPP do e gjente një arsye. Kryetar Jonaidi është menduar 1 muaj se çfarë argumenti të gjente. Kështu, KPP e ka rrëzuar ankesën me justifikimin se është dorëzuar para afatit. Mos u çudisni! Jonaid Myzyri e bën të zezën të bardhë për Lali Erin. Këto janë manovra që bëhen nga Myzyri qëllimisht për të shmangur përballjen me të vërtetën. KPP e Myzyrit e shikon “flamurin e kuq” për riskun e lartë për korrupsion në këtë tender.
Ja çfarë ka ndodhur! Firmës “Curri shpk” i është komunikuar me datë 18 prill 2023 se është skualifikuar nga gara.
Kjo e fundit për të mos humbur afatin 10 ditor që përcakton ligji për ankesat, ka dorëzuar ankesën më datë 3 maj 2023. Në këtë ankesë kompania tregon se Bashkia Tiranë ka marrë vendim të padrejtë dhe fituesi kaq qenë i paracaktuar.
Si pjesë e manipulimit, Bashkia e Lali Erit njoftimin për fituesin dhe skualifikimit e ka kaluar në sistem me datë 25 prill 2023. Kështu, në sistem, del që ankimuesi ka paraqitur ankesën para afatit. Në fakt konkretisht nuk është ashtu.
Sakaq, KPP nuk është marrë fare me problematikën që ka ngritur ankesa, por ka vendosur menjëherë anulimin e saj për shkak se në sistem rezulton para afatit. Edhe po të ishte e vërtetë “ankesa e parakohshme”, ky vendim është qesharak, abuziv dhe i korruptuar!
Atëherë, kur qëndron çështja kështu dhe KPP nuk e ka marrë fare në shqyrtim ankesën, pse duhej ta vononte dy javë përgjigjen?
Epo, sikur thamë më lartë KPP është kujdesur që të mos i prish planet e Lali Erit për përvetësimin me korrupsion të parave të tenderit. Me këto para ndërkohë përkëdheleshin para fushatës edhe VIP-at e Lagjes “Kodra e diellit” që i bënë fresk Lali Erit.
Kujtojmë se gjatë fushatës elektorale artistë të shumtë, duke filluar nga “Noizy”, të cilit Veliaj i financoi koncertin, te Alban Skënderaj, Çiljeta dhe të tjerë, shkonin nëpër mitingjet e tij për të kërkuar votën e qytetarëve.
VIP-at në Tiranë kryesisht jetojnë në lagjen “Kodra e Diellit”, përfshirë edhe ata që u bën pjesë e fushatës. Prandaj që në fillim të garës Veliaj u kujdes që t’u bënte ndere, ku përfshihen jo vetëm honorare, por edhe asfalt dhe pemë tek rruga e shtëpisë!
Lexo edhe:Fiton oligarku i fondeve/ Veliaj, 1.8 mln euro për lagjen e VIP-ave
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post