Pallatet që prishi tërmeti Veliaj nuk ka filluar akoma t’i rindërtojë, kurse paratë i bën “rrush e kumbulla” nëpër fasada. Ditën e sotme Bashkia Tiranë ka shpallur garën për prokurimin me objekt “Rehabilitim i qendrës Kinostudio”. Lidhur me rindërtimin e pallateve të dëmtuara të prishura nga tërmeti në këtë zonë, Veliaj ka premtuar se do t’i kemi gati brenda këtij viti. Por paratë shkojnë për rikonstruksionin e rrugës “Aleksandër Moisiu” dhe Sheshin Kinostudio. 6 miliardë lekë është fondi limit i përcaktuar për këtë prokurim, ndërsa afati që duhet të mbyllen këto punime është 1 vit.
Kjo vlerë është shumë e lartë për shërbimet që do kryhen në këtë zonë dhe kjo vërtetohet nga detajet e paraqitura në dokumentacionet e tenderit. Sipas të dhënave, me këtë shumë parash do të bëhen rikonstruksioni i rrugës “Aleksandër Mosiu”, rregullimi i hapësirave të gjelbra, rregullimi nga jashtë i ndërtesave.
“Qëllimi dhe objektivi i projektit është hartimi i projekt preventivit për punimet ku bëjnë pjese rikonstruksioni i rrugës “Aleksandër Moisiu”, sheshit dhe hapësirave publike, synon të rrisë sipërfaqet e gjelbra në mënyre të sistemuara, të krijojë ambiente rekreative për banorët që jetojnë dhe punojnë përreth këtij sheshi, ndërtim ambientesh të përshtatshme për fëmijët, gjithashtu restaurimin e fasadave të banesave që ndodhen përreth sheshit si dhe rehabilitimin e stacionit të autobusëve, si dhe përcaktim sa më të përshtatshëm të orientimit të lëvizjes së mjeteve në rrugët lidhëse që përdorin banorët përreth këtij sheshi”, thuhet në dokument.
Me pak fjalë këto punime do të shërbejnë më shumë si dekor, fasadë që duket bukur. Por, në asnjë pikë nuk përfshihen rikonstruksion u banesave të prekura nga tërmeti. Vallë, i harroi Lali Eri banorët që po jetojnë me qira, ose në godina që iu rrezikojnë jetën. Pasi, kohët e fundit asnjë prokurim apo projekt nuk është mbyllur më për procesin e rindërtimit.
Më tutje evidentohet se data e mbylljes së garës është vendosur më 17 tetor, çka do të thotë që nga fundi i muajit nisin punimet. Po përse Veliaj kujtohet të kryej punime të tilla në kohë shirash dhe ngricash, duke qenë se projekti do të zgjasë një vit? Mbase sepse në këtë mënyrë gjatë dimrit mund të bëhet shtyrje projekti dhe më pas të shtohen të tjera financime për shkak të problematikave në terren. Tashmë kjo është një nga taktikat e njohura të Veliajt, të përdorur në shumë kontrata të tjera.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post