Ish-koordinatori i Bindjes Demokratike, Astrit Patozi shprehet se tani që Gjykata Kushtetuese shpalli vendimin për rrëzimin e kërkesës, që kontestonte zgjedhjet lokale të 2019-ës, sipas tij, del më e qartë panorama e përgjegjësisë së rëndë politike të atyre që udhëhiqnin opozitën. Në një postim në “Facebook”, ai vë në dukje heshtjen e Lulzim Bashës, Sali Berishës dhe Ilir Metës, pas këtij vendimin, të cilin e quan “shuplakë përcëlluese”.
“Heshtja, që flet dhe i bën njësoj përgjegjës. Tani që Gjykata Kushtetuese shpalli vendimin për rrëzimin e kërkesës, që kontestonte zgjedhjet vendore të qershorit 2019, del më e qartë panorama e përgjegjësisë së rëndë politike të atyre, që atëherë udhëhiqnin dhe përfaqësonin opozitën. Se si për shkak të një marrëzie djallëzore iu dorëzua i gjithë pushteti lokal sovjetëve, ndërkohë që kjo temë nuk para trajtohet, si nga bunkeri “statutor”, ku është mbyllur Lulzim Basha për t’u mbrojtur nga partia e vet, ashtu edhe nga “foltorja” e revolucionit paqësor, që do të rithemelojë pluralizmin në Shqipëri”, shkruan ai.
Sipas tij, e vetmja që ka luftuar për të nxjerrë të vërteten është Voltana Ademi, ndërsa të tjerët u blenë nga Rama.
“Ndaj edhe sot nuk është dita për të kërkuar humbjen e Voltana Ademit, sepse ajo ndoshta është e vetmja opozitare që ka fituar nga zgjedhjet e qershorit 2019, pavarësisht se pa asnjë meritë. Por për të parë se si heshtin njëkohësisht për këtë shuplakë përcëlluese si të ishin në kohërat e arta të dashurisë midis tyre kryetari “de jure” i Partisë Demokratike, “foltorja” dhe Presidenti i Republikës”, shkruan ai. Sipas Patozit, ky vendim tregoi që drejtësia është marrë peng nga qeveria.
Discussion about this post