Edhe pas arrestimit të 4 personave që u kapën në flagrancë duke shqyer sendet e bronzit në varrezat e Suelasit në qytetin e Beratit, vjedhjet në këto varreza nuk janë ndalur.
Hajdutët nuk po lënë më as te vdekurit të prehen të qetë, pasi prej disa kohësh në këto varreza janë duke u vjedhur zbukurime të ndryshme me vlerë si dhe vazot prej bronzi.
Vjedhjet në shumtën e rasteve kanë ndodhur gjatë natës, për shkak se varrezat nuk janë të rrethuara me mur në disa krahë ku janë shtuar sipërfaqet e reja.
Thyerje të fotografive prej porcelani, grabitje të vazove të ndriçimit të bronzit si dhe dëmtime të llojeve të ndryshme e deri në shkatërrim të pllakave prej mermeri të varreve është panorama që vijon prej disa kohësh në varrezat e Suelasit të qytetit të Beratit.
Roja i varrezave, Polizoi Tavanxhiu tregon se, në të gjitha rastet kur ai ka konstatuar vjedhjet e shumë varreve ka njoftuar menjëherë policinë. Tavanxhiu shprehet se, dhunuesit dhe hajdutët e varreve janë përdorues droge por edhe persona nga shtresat vulnerabël, ndërkohë që sipas tij vjedhjet në të shumtën e rasteve kryhen gjatë natës.
Tavanxhiu deklaron se masa duhet të merren edhe ndaj pikave të grumbullimit dhe mbledhjes së hekurishteve, ku hajdutët i çojnë për shitje sendet e vjedhura në varreza.
Edhe qytetarët deklarojnë se, ky fenomen vjedhjesh është shtuar së tepërmi në varreza dhe thuajse kudo, në çdo varr, janë shqyer kupat e bronxit dhe janë dëmtuar. Ata i cilësojnë këto veprime të shëmtuara dhe turp i madh, ndërkohë që kërkojnë që policia të marrë masa.
Vjedhja dhe dëmtimi i Varrezave Publike të Suelasit në Berat është një fenomen i njohur prej vitesh. Edhe pse gjatë 3-muajve të fundit janë arrestuar 4 prej dhunuesve të varreve, vjedhjet vazhdojnë ende dhe sendet e vjedhura përdoren nga hajdutët për ti shitur në pikat e grumbullimit për skrap, në këmbim të një shume parash.
Discussion about this post