Një grabitje e bujshme ka tronditur Francën, ku hajdutët kanë arritur të vjedhin bizhuteri me vlerë deri në 4 milionë euro nga Muzeu Lalique, në Wingen-sur-Moder, në verilindje të vendit.
Sipas autoriteteve franceze, autori ose autorët hynë me forcë në muze rreth orës 05:30 të mëngjesit të së dielës dhe u drejtuan menjëherë në sallën ku ekspozoheshin bizhuteritë më të çmuara. Gjatë grabitjes u vodhën rreth 20 bizhuteri, ndërsa vlera e dëmit ekonomik po vlerësohet, por besohet se arrin në disa milionë euro.
Edhe pse sistemi i alarmit u aktivizua, personi i parë që mbërriti në vendngjarje ishte një punonjës pastrimi, i cili konstatoi vjedhjen dhe njoftoi menjëherë policinë. Hetuesit kanë sekuestruar pamjet e kamerave të sigurisë dhe po punojnë për identifikimin dhe kapjen e autorëve.
Pas ngjarjes, drejtuesit e Muzeut Lalique njoftuan se institucioni do të qëndrojë i mbyllur për disa ditë, derisa të përfundojnë hetimet dhe të kryhen verifikimet e nevojshme.
Muzeu, i hapur në vitin 2011 pranë fabrikës historike të kompanisë Lalique, i kushtohet krijimtarisë së René Lalique, një prej emrave më të njohur në artin e bizhuterive dhe punimeve në qelq të stileve Art Nouveau dhe Art Deco.
Kjo grabitje rikthen në qendër të vëmendjes çështjen e sigurisë në muzetë francezë, pas vjedhjes së bujshme në Muzeun e Luvrit në Paris tetorin e kaluar, kur autorët vodhën bizhuteri me vlerë 102 milionë dollarë në më pak se tetë minuta.
Discussion about this post