Deputeti i Partisë Demokratik Kreshnik Çollaku e ka konsideruar një provokim të panevojshëm ndaj Kosovës sugjerimin e kryeministrit Edi Rama për emërimin e Vlora Hysenit në krye të SHISH, një person i shkarkuar më herët nga detyra për shkak të nxjerrjes së informacioneve të klasifikuara.
Në një postim në Facebook, Çollaku shkruan se fakti që institucionet e Kosovës në fushën e inteligjencën e kanë shkarkuar dhe Shqipëria i jep poste të rëndësishme, i duket e pazakontë. Ai thotë ndër të tjera se të dyja vendet duhet të mbajnë marrëdhënie vëllazërore mes tyre dhe të ecin drejt një funksionimi të përbashkët.
Postimi:
Provokim i panevojshëm ndaj Kosoves. Nga mediat mësova se kryeministri Rama ka propozuar presidentit Begaj znj Vlora Hyseni si kandidate për kreun e SHISH.
Është hera e parë që e dëgjoj emrin e znj Hyseni dhe nuk kam asnjë njohje për cilesinë dhe aftesinë e saj në krye të kësaj detyre. Çfarë më bën përshtypje është fakti se znj Hyseni ka mbajtur për një periudhë kohe pozicionin e nën drejtores së AKI (shërbimit inteligjent Kosovë) dhe është shkarkuar nga aty nga Presidentja Vjosa Osmani dhe kryeministri Albin Kurti.
Nuk njoh asnjë nga arsyet e këtij shkarkimi, por më duket e pazakontë që një zyrtar të shkarkuar nga institucionet e Kosovës (në fushën e inteligjencës) të emërohet po në këtë fushë nga Shqipëria. Marrëdhëniet midis Shqipërisë e Kosovës janë vëllazërore e duhet të shkojnë drejt funksionimit të përbashkët.
Ky rast më duket një provokim i panevojshëm nga Shqipëria karshi institucioneve të Kosovës. Është jashtë çdo arsyeje që kjo të ndodhë. Midis institucioneve të dy vendeve tona, duhet sa më shumë bashkëpunim e bashkërendim, ndërsa gjeste të tilla stimulojnë konflikt të panevojshëm dhe të dëmshëm. Unë nuk e kuptoj këtë sjellje të kryeministrit por mbetem me shpresë se Presidenti Begaj nuk do të lejojë krijimin e një klime të panevojshme e të dëmshme provokimi, mosbesimi e mosbashkëpunimi midis institucioneve të Republikës së Kosovës dhe të Republikës së Shqipërisë.
Discussion about this post