Vrasja e Liridona Ademajt më 29 nëntor vijon të trajtohet jo vetëm nga mediat, por edhe nga ekspertët e sigurisë. Policia e Kosovës arrestoi 4 persona si të përfshirë në krim, mes të cilëve edhe Naim Murselin, bashkëshortin e Liridonës.
Ngjarja fillimisht u trajtua si një grabitje, ku Naimi kishte marrë dy fëmijët e mitur nga makina ku ata ndodheshin, ndërsa Liridona u qëllua për vdekje nga grabitësi. Por hetimet zbuluan skenarin, ku deri më tani dyshohet se Naim Murseli kishte porositur vrasjen, madje një prej të arrestuarve, personi që shkrepi armën, ka pohuar se i ishte premtuar shuma prej 30 mijë euro.
Lidhur me krimin e rëndë, ku motivet mbeten ende mister, ka reaguar edhe Hajrullah Tërnava, ekspert sigurie, i cili në një intervistë për Euronews Albania pohoi se vrasja e Liridona Ademajt me porosi të bashkëshortit të saj Naim Murseli ishte e përgatitur keq dhe që në fillim u ngritën dyshimet për këtë të fundit.
Tërnava tha se ngjarja ka qenë tronditëse për mbarë opinionin për mënyrën si është organizuar dhe rrethanat e vrasjes së nënës së dy fëmijëve.
“Rrethanat dhe mënyra e ekzekutimit të bashkëshortes së tij Liridonës, Naimi që është munduar të planifikojë dhe në të vërtetë ka bërë gabime trashanike pasi në fillim është krijuar dyshimi se aty ka drejtpërdrejtë dorë ai vetë.
Është një vrasje që ka tronditur gjithë publikun. Ka pasur dhe do ketë vrasje të rëndomta, por kjo është një befasi se si një i ri ka vrarë të shoqen që ka pasur 2 fëmijë të shëndetshëm, është e pakuptimtë.
Dhe mënyra se si është vrarë, duke shkuar në darkë në një restorant të njohur ku ka pasur ngjitur edhe dorasin dhe duke bërë planin që merr fëmijët nga makina dhe gruan e ka lënë aty, që është diçka e pakuptimtë se çdo burrë i martuar, nëse do ishte ballafaquar me një situatë të tillë ai do kishte sakrifikuar jetën të mbronte anëtarët e familjes dhe jo të merrte fëmijët, çka duket qartë që ka pasur përgatitje”, tha eksperti.
Discussion about this post