Zbardhen porositë e Ministrisë së Drejtësisë për drejtorët e burgjeve. Ministri i Drejtësisë Ulsi Manja ka zhvilluar një takim me drejtuesit e Burgjeve dhe të Policisë së Burgjeve, ku në fokus të këtij takimi ishin problematikat në sektorin e burgjeve. Manja kërkoi me këmbëngulje, vigjilencë maksimale për gjithçka që ndodh në institucionet e vuajtjes së dënimit.
“Është detyrim që të realizohet puna me integritet dhe bashkëpunim të ndërsjellë, si administrativ dhe policor, si e vetmja rrugë për të përmbushur detyrën. Këto detyra janë një përgjegjësi përpara ligjit dhe së drejtës”, theksoi ministri i Drejtësisë.
Ndërkaq, u theksua se janë marrë të gjitha masat për të pasur infrastrukturën e nevojshme për të dënuarit dhe ofruesit e shërbimeve.
