Një bazë prostitucioni dhe trafiku droge është zbuluar dhe goditur nga policia në Elbasan, duke çuar në pranga 4 gra nga Kolumbia dhe Republika Domenikane, kurse organizatori i aktivitetit ilegal është shpallur në kërkim.
Një godinë trekatëshe në lagjen “Visarjon Xhuvani” në Elbasan, ishte përshtatur për ushtrim prostitucioni dhe shpërndarje të lëndëve narkotike.
Policia arrestoi në flagrancë katër shtetase të huaja, nga Kolumbia dhe Republika Domenikane, të moshave 25 deri në 35 vjeç. Sipas hetimeve, ato ishin të përfshira drejtpërdrejt në aktivitetin kriminal, duke ushtruar prostitucion dhe duke shpërndarë drogë për klientët.
Në ambientet e godinës, policia sekuestroi rreth 0.5 kg Cannabis Sativa dhe 35.3 gram kokainë, si dhe një shumë parash, telefona celularë dhe sende të tjera që dyshohet se përdoreshin për këtë aktivitet.
Nga hetimet është identifikuar edhe organizatori i dyshuar i kësaj skeme, një shtetas shqiptar 56 vjeç me inicialet A.T., i cili është shpallur në kërkim. Autoritetet bëjnë me dije se vijon puna për kapjen e tij.
Njoftimi i policise
Zbulohet se në një objekt 3-katësh, në lagjen “Visarjon Xhuvani” në Elbasan u ushtrohej prostitucion dhe shiteshin lëndë narkotike Kokainë dhe Cannabis Sativa. Arrestohen në ambientet e objektit, 4 shtetase nga Kolumbia dhe Republika Domenikane, të përfshira në këto veprimtari kriminale. Identifikohet dhe shpallet në kërkim organizatori. Sekuestrohen 0.5 kg lëndë narkotike Cannabis Sativa, 35.3 g lëndë narkotike Kokainë, shuma parash, armë sportive, celularë dhe sende të tjera që lidhen me dy veprimtaritë kriminale.
Specialistët e strukturave hetimore të Drejtorisë Vendore të Policisë Elbasan, në bashkëpunim me specialistët e seksioneve për Hetimin e Trafiqeve dhe për Mbështetjen Operacionale, si rezultat i një hetimi intensiv, me metoda proaktive, të kryer në koordinim me Prokurorinë e Elbasanit, me qëllim dokumentimin me prova ligjore të vënies së një objekti disakatësh, në lagjen “Visarjon Xhuvani”, në funksion të disa veprimtarive kriminale, finalizuan operacionin e koduar “Streha”.
Gjatë ndërhyrjes në objekt, u arrestuan në flagrancë shtetaset e huaja, B. M., 35 vjeçe, D. G., 27 vjeçe, L. M., 25 vjeçe dhe J. B., 33 vjeçe. Nga hetimi rezultoi se ato ushtronin prostitucion në objektin 3-katësh, si dhe iu shitnin shtetasve që përfitonin nga kjo veprimtari kriminale, lëndë narkotike Kokainë dhe Cannabis Sativa. Gjithashtu, nga hetimi u identifikua organizatori i këtyre veprimtarive kriminale, shtetasi A. T., 56 vjeç, për lokalizimin dhe kapjen e të cilit, Policia vijon intensivisht punën. Materialet procedurale iu referuan Prokurorisë së Elbasanit, për veprime të mëtejshme.
Discussion about this post