Nënkryetari i Partisë Demokratike në Komisionin e Ekonomisë, Alfred Rushaj ka kërkuar informacion nga ministrja e Financave, Delina Ibrahimajn lidhur me fondin që ka parashikuar qeveria për zgjatjen e organeve të Vettingut.
Rushaj u shpreh se qeveria do të duhej të kishte parashikuar fonde për KLGJ-në dhe KLP-në të cilat do të bëjnë Vettingun pas qershorit 2022, pasi përfundon afati i Komisionin të Pavarur të Kualifikimit (KPK).
“Znj. ministre, në qershor 2022 Kushtetuta parashikon që KLGJ dhe KLP do të marrin përsipër në bazë të kushtetutës, një funksion që është ai i Vetting-ut të gjyqtarëve dhe prokurorëve. A keni marrë masa që këto dy institucione të kenë buxhetin e nevojshëm për të përballuar këtë detyrim. Për ta bërë këtë ato duhet të kenë fondin e mjaftueshëm që tani, që në janar! Duan infrastrukturën e nevojshme, burimet njerëzore dhe të tjera, duke filluar që në janar. Do të ketë nevojë për burime njerëzore, infrastrukturë, në mënyrë që ajo që parashikon kushtetuta të realizohet pa vonesë. Sa është fondi dhe a është i mjaftueshëm për këto dy institucione?”, ka thënë Rushaj.
Kërkesa e Partisë Socialiste për ndryshim të Kushtetutës që synon zgjatjen e mandatit të organeve të Vettingut të magjistratëve, do nisë të shqyrtohet pas pak në mbledhjen e përbashkët të Këshillit për Legjislacionin dhe Komisionit parlamentar të Ligjeve.
