Ish-ministri i Brendshëm, Fatmir Xhafaj ka kundërshtuar nismën kushtetuese për zgjatjen e mandatit të organeve të Vettingut, duke dalë kështu kundër propozimit të bërë nga deputetët e partisë së tij.
Deputeti, që dikur ka drejtuar Komisionin për Vettingun, nënvizoi sot në mbledhjen e “Ligjeve” se duhet një analizë e plotë, pasi sipas tij mbi procesin janë hedhur shumë dritëhije.
“Kushtetuta e ka zgjidhjen sot që flasim, edhe opsionin kur do të përfundonte afati 5-vjeçar i këtyre institucioneve. Nuk është thjesht një nen i vetëm dhe teknik, por është çështje e rëndësishme varet integriteti i vetë reformës në drejtësi. Ne duhet të gjykojmë për këtë proces. Kjo zgjidhje që propozojmë, e konsolidon këtë proces? Në gjykimin tim është e nevojshme një analizë e plotë e situatës aktuale. Pse 2.5 vjet, e jo 3 vjet? Duhet një analizë që të kuptojmë a po marrim vendimin e drejtë, që t’i qëndrojmë parashikimit të ri. Mbi procesin janë hedhur shumë dritëhije. Cilët janë faktorët e vonesës së Vettingut? Pse u kalua 5-vjeçari?,” tha Xhafaj në mbledhjen e Komisionit të Ligjeve.
Ndër të tjera, Xhafaj tha se është i pakënaqur me ritmin e punës të KPK-së dhe ONM-së në këtë proces, duke kërkuar garanci nëse nuk do të duhet që mandati të shtyhet sërish pas dy vitesh.
Më herët, deputetët e PD u larguan nga mbledhja pasi kërkuan shtyrjen e saj dhe marrjen në shqyrtim edhe të kërkesave të demokratëve për ndryshime në Kushtetutë më datë 3 nëntor.
