Zoti e baftë mirë për shqiptarët

Vetëm ideja se të dhënat personale të shtetasve shqiptar gjenden në duart e mafias ndërkombëtare është tronditëse, aq sa qytetarët shqiptar nuk duhet t’i zinte gjumi natën. Në fakt gjithçka çfarë duhet ta ruante shteti dhe të mbetej sekret përjetë, sot nuk ekziston më si i tillë. Kriminelët kanë në filet e tyre gjithçka, për gjithsecilin individ, burrë, grua, fëmijë – sidomos fëmijë. Ata mund t’i përdorin në çdo moment të jetês së individit, jeta dhe e ardhmja e të cilit tani varet nga fati, nëse të dhënat e tij një ditë do të keqpërdoren nga ata që i zotërojnë.

Pastaj presim respekt për pasaportën e një shteti të shpartalluar, që për ironi të fatit është edhe Anëtar i Këshillit të Sigurimit të OKB-së.

Imagjinoni pak; një ditë të bukur kur dikush nga Lindja e Mesme të klonojë pasaportën e çdo njërit prej nesh, dhe pastaj të kryej çdo lloj vepre penale, deri edhe terroriste. Ndaj mos u çuditni nëse ndonjë ditë të gjendeni përball suprizave të pakëndshme në pikat e kalimit kufitar. Ose të pezullohet lëvizja e lirë – sepse dihet që kushti themelor për liberalizimin e vizave ishte siguria e dokumentave dhe pasaportat.

Shteti ekziston pikërisht për të mbrojtur interesat jetike të shtetasve. Dhe interesi kryesor i çdo qenie njerëzore në një shoqëri – përfshirë edhe diktaturat – është të jetë i mbrojtur për disa gjëra elementare, si dokumentat zyrtare dhe të dhënat personale. Në historinë e njerëzimit nuk ka ndodhur një rast i ngjashëm – në asnjë rast, në asnjë kohë.

Sistemet e Policisë së Shtetit tani nuk kanë asnjë sekret, një dëm që mund të shkatërrojë përfundimisht organizatën e policisë. Askush nuk është më i sigurtë, as policia, as qytetarët. Me shumë gjasa vrasjet mund të shumëfishohen, madje edhe mes rradhëve të policisë (të infiltruarit), që realisht ndodhen nën një rrezik eksponencial.

Kryeministri Edi Rama – një delirant i paskrupullt – tall menderen duke projektuar satelitët Albania 1 dhe 2, ndërkohë që dokumentat e shtetit kanë pushtuar hapësirën e internetit global. Askush nga populli; një popull i lodhur, i dërrmuar, që vuan për bukën e gojës, i mpirë dhe i pashpresë – nuk reagon. Edhe kafshët do të reagonin me dhunë nëse bariu do t’i trajtontë siç i trajton Edi Rama shqiptarët.

Por më tronditëse se gjithçka është heshtja e opozitës, në fakt e të dyja copave të opozitës. Asnjë fjalë, asnjë lëvizje, asnjë reagim, por vetëm heshtje e turpshme, njësoj sikur ishte fjala për majmunë, dhe jo shtetas shqiptar. Dhe të mendosh se shtatori ishte shpallur si fundi i Edi Ramës.

Kurrë më parë shqiptarët nuk kanë qenë më keq, kurrë më parë nuk kanë qenë kaq të pashpresë. Opozita vetëm emrin e ka të tillë, sepse misioni i saj nuk janë më interesat e qytetarëve, por interesat e sistemit që mban në lojë Edi Ramën, Sali Berishën dhe Ilir Metën. Me këtë opozitë, Edi Rama mund të vdesë në karrigen e Kryeministrit diku rreth 90 vjeç.

Mbetet vetëm lutja: