Një skandal ka përfshirë Policinë e Qytetit të Zyrihut, pasi dy efektive janë vënë në qendër të hetimeve për shkak të lidhjeve të tyre me një 35-vjeçar shqiptaro-zviceran, i cili është i njohur nga autoritetet për të kaluarën e tij kriminale.
Sipas mediave zvicerane, 35-vjeçari paraqitej në rrjetet sociale si një sipërmarrës i suksesshëm, duke publikuar një stil jetese luksoz me jahte, makina sportive dhe festa me persona të njohur.
Megjithatë, autoritetet raportojnë se ai ka një të kaluar kriminale, duke qenë i dënuar për disa vepra penale, përfshirë përdhunim, trafik narkotikësh dhe shkelje të rënda të rregullave të qarkullimit rrugor.
Hetimet zbuluan se njëra prej policeve i kishte dhënë atij akses në sistemet informative të policisë, duke lënë të zhbllokuar telefonin e punës.
Kjo i kishte mundësuar 35-vjeçarit të kryente kërkime në bazat zyrtare të të dhënave.
Për këtë shkelje, efektivja u dënua me urdhër penal në muajin prill dhe humbi vendin e punës.
Ndërkohë, shqiptaro-zvicerani kishte krijuar një lidhje edhe me një efektive tjetër të Policisë së Zyrihut.
Ndaj saj është hapur një procedim penal nën dyshimin për shkelje të sekretit zyrtar.
Autoritetet kanë theksuar se deri në një vendim përfundimtar, ndaj saj vlen prezumimi i pafajësisë.
Ajo nuk është më pjesë e forcave të policisë që prej dhjetorit 2025.
Policia e Qytetit të Zyrihut ka deklaruar se nuk mund të japë më shumë informacione për shkak të mbrojtjes së të dhënave personale.
Institucioni bëri të ditur se prej vitit 2015 ka ngritur një sektor të posaçëm për parandalimin e shkeljeve nga punonjësit dhe se efektivët trajnohen rregullisht për etikën dhe përgjegjësitë profesionale.
Megjithatë, autoritetet pranojnë se sjellja e punonjësve jashtë orarit të punës mbetet jashtë kontrollit të drejtpërdrejtë të institucionit, edhe pse efektivët kanë detyrimin ligjor të mos dëmtojnë besimin dhe imazhin e policisë.
Discussion about this post