Trupi i një tjetër emigranti, i cili ndodhej në bordin e varkës me vela që u përmbys në prag të Krishtlindjeve në Paros dhe shkaktoi vdekjen e 16 personave, u gjet në zonën detare të Kionias në Tinos.
Sipas dëshmive të dhëna nga 63 emigrantët e shpëtuar të varkës me vela, bëhet fjalë për një burrë që ndodhej në varkë, rreth 1.80 m i gjatë dhe rreth 30 vjeç.
Në vendngjarje kanë shkuar efektivët e Autoritetit Portual përkatës, të cilët me ndihmën e efektivëve të Policisë Tinos kanë nxjerrë trupin e pajetë nga deti.
Ndërkohë ditën e djeshme tre persona, mes 63 emigrantëve të shpëtuar, u arrestuan nga Autoriteti Portual Paros, për transport të paligjshëm emigrantësh.
Sipas Rojes Bregdetare, të arrestuarit dyshohet se kanë marrë pjesë në një organizatë kriminale që vepronte në transferimin e paligjshëm të emigrantëve nga Turqia në Itali për 9 mijë euro për person.
Bëhet fjalë për një 40-vjeçar dhe dy 31-vjeçarë, të gjithë shtetas sirianë, të cilët u arrestuan për kontrabandë dhe transport emigrantësh nga Turqia drejt Italisë, mbytje të anijes, vrasje dhe ngritje të një organizate kriminale.
Discussion about this post