Deputeti demokrat Dashnor Sula gjatë seancës së sotme parlamentare u shpreh se ministret shkojnë në Kuvend për të bërë paradë mode. Këtij komenti i është përgjigjur ministrja e Infrastrukturës dhe Energjisë, Belinda Balluku, e cila gjatë fjalës së saj u shpreh se ministret mezi dallohen nga garda. Sipas saj, ata vishen me të zeza pasi bëjnë kilometra në terren pranë qytetarëve.
“Nëse do mblidhnin kilometrat që ka bërë kryeministri nuk iu dalin fare llogaritë mirë. Kilometra vazhdojmë e bëjmë përditë. Juve ju takon më shumë të shkoni në terren. U morët me modën e ministrave. Ne dallohemi pak nga vajzat e gardës se jemi të gjitha të veshura me kostume të zeza dhe me pantallona se na duhet të shkojmë edhe nëpër rrethe.”
Ajo kërkoi që në foltoren e Kuvendit të flitet me fakte dhe shifra, teksa theksoi se energjia elektrike nuk do të rritet.
“Mos t’i futemi kush bën modë më shumë. Nuk e di ku i patë numrat. Kur dilni këtu duhet të dilni me numra dhe fakte. Nuk mund të thonë që do dalë biznesi i madh në treg. Juve nuk ju pëlqen. Ne do vazhdojmë të mbrojmë biznesin e vogël dhe familjarin. Asnjë qindarkë nuk do rritet energjia elektrike sepse qeveria ka marrë përsipër ta mbrojë këtë fashë”, tha ministrja.
Por ndonëse Balluku shprehet se nuk do të ketë rritje të energjisë elektrike për bizneset e vogla, kujtojmë se disa ditë më parë OSHEE dhe OST aplikuan pranë Entit Rregullator të Energjisë për rritje të çmimit vitin e ardhshëm dhe ky vendim ka hyrë tashmë në fuqi. Ky vendim nënkupton rritje të tarifës mesatare të shpërndarjes së energjisë me 34%, e thënë ndryshe nga 4.79 lekë për kilovat në orë që ishte përpara këtij vendimi, pas miratimit të këtij propozimi do të bëhet 6.42 lekë kilovat për orë, gjë e cila pritet të aplikohet që në muajin e ardhshëm. Kjo rritje siç ishte paralajmëruar do të prekë bizneset e mëdha.
Discussion about this post