Mungesa e tregut për prodhime bujqësore, fermerët protestojnë në Maliq

Fermerët po protestojnë në Maliq, për shkak të mungesës së tregut për prodhimet e tyre bujqësore.

Ata janë grumbulluar së bashku me mjetet e tyre në rrugën hyrëse të fshatit Drithas.

Fermerët nga fshatrat e fushës së Korçës janë grumbulluar pasi thonë se po përballen me mungesën e tregut.

Për shkak të mungesës së subvencioneve sipas tyre prodhimi del me kosto më të lartë ndaj ata konkurohen nga prodhimet që futen nga jashtë.

Fermerët thonë se i gjithë prodhimi i qepës, patates, misrit dhe grurit ka mbetur stok.

Protesta është shoqëruar me tensione dhe përplasje mes protestuesve dhe Policisë së Korçës, por edhe mes vetë organizatorëve e të pranishmëve.

Bllokimi i një segmenti rruge në aksion nacional Korçë-Pogradec nga ana e protestuesve ka sjellë tensione mes këtyre të fundit dhe policisë.

Policia ju ka kërkuar ogranizatorëve të mos bllokojnë rrugën nacionale pasi nuk kanë leje për të bërë një gjë të tillë.

Policia ju ka kujtuar se ata kanë leje vetëm për të protestuar paqësisht, pa bllokuar segmentin rrugor. Në kushte kur fermerët nuk kanë pranuar lirimin e rrugës, ka qenë e pamundur shmangja e konfrontimeve fizike mes palëve.

“Për 10 ditë do bllokojmë rrugën, policia është e njoftuar. Nuk ka nevojë të marrim më lejë, policia është e njoftuar”, deklaroi njëra nga protestueset.

Vetë Drejtori i Policisë Gjovalin Loka, po tenton që të qetësojë dhe largojë protestuesit nga rruga.