Zëvendëspresidentja e Partisë së Lirisë, Erisa Xhixho ishte sot në zonën e Astirit në Tiranë, ku denoncoi mungesën e shkollës për fëmijët e kësaj zone.
“Këtu do të duhej të ishte sot shkolla që kryebashkiaku Erion Veliaj u premtoi banorëve dhe vogëlushëve të Astirit. Siç e shihni, edhe këtë vit shkollor, mijëra vogëlushë të kësaj lagjeje do të udhëtojnë drejt qendrës, në pikun e trafikut, duke shtuar koston e transportit në xhepat e prindërve, sepse Bashkisë së Tiranës i duhen paratë për kompaninë 5D dhe inceneratorin fantazmë”, deklaroi ajo.
Në vend që të kenë shkollën e tyre, vijoi Xhixho, mbingarkojnë shkollat e tjera, duke e bërë të detyrueshëm mësimin me 2 turne, që kryebashkiaku Veliaj ka premtuar vite më parë se do t’i jepte fund.
“Banorët e Astirit e kanë paguar taksën e arsimit e cila ka arkëtuar në 8 vite, 66.1 million euro. Kanë paguar por nuk kanë marrë shërbim që meritojnë. Njësoj si fëmijët e Astirit, vuajnë edhe fëmijët e Kasharit, Liqenit e Freskut, për shkak të papërgjegjshmërisë dhe abuzimit me paratë e qytetarëve të Tiranës”, shtoi Xhixho.
Sipas saj, bashkia e Tiranës ka buxhetuar 17 shkolla, por ka ndërtuar vetëm 9 prej tyre.
“Tiranës i duhen 21 shkolla të reja, që ti jepet fund agonisë së mësimit me dy turne! Hapësira ka për kulla, por nuk ka për shkolla, kopshte dhe çerdhe”, shtoi Xhixho.
Discussion about this post