Është shtyrë për 9 tetor seanca fillestare ndaj tre të akuzuarve për sulmin terrorist në Banjskë të Zveçanit një vit më parë.
Shtyrja u vendos pasi avokatët e të akuzuarve Dushan Maksimoviç, Vladimir Toliç dhe Blagoje Spasojeviç kërkuan më shumë kohë për të lexuar shkresën e lëndës dhe provat e Prokurorisë.
Fillimisht në seancën e nisur të mërkurën, gjyqtari Arben Hoti konstatoi se ka kushte për nisjen e shqyrtimit fillestar ndaj të pandehurve që gjenden në masën e paraburgimit. Për gjykimin në mungesë, të 42 personave të tjerë të akuzuar, do të kërkohet opinion nga Gjykata Supreme.
Paraprakisht, prokurori special, Naim Abazi, ka thënë se pjesa tjetër e grupit terrorist nuk ka mundur të kapet për t’u sjellë në gjykatë. Ai ka thënë se pavarësisht kësaj, mund të bëhet gjykimi në mungesë.
Kurse avokati i palës së dëmtuar, Arianit Koci, ka thënë se s’ka faktorë që gjykata të vendosë të mos mbahet gjykimi në mungesë.
Gjykata po ashtu me fillim ka konstatuar që prokuroria e ka përmbushur obligimin për ofrimin e shkresës së lëndës palës së akuzuar, në mënyrë elektronike, edhe pse avokatët e të akuzuarve kërkuan që ato të dorëzohen në formë fizike.
Pas konstatimit të gjykatës se Prokuroria ka kryer obligimin për dorëzim të shkresës së lëndës, Pantoviç, avokat i njërit prej të akuzuarve, kërkoi që seanca të ndërpritet. Edhe avokati i Vladimir Toliçit, Milosh Deleviç, kërkoi më shumë kohë për përgatitje.
Prokurori Abazi i ka cilësuar të papranueshme kërkesat e mbrojtjes duke thënë se mbrojtja e ka pasur në dispozicion aktakuzën në afat të arsyeshëm.
Kurse gjykatësi Hoti ka thënë se nuk mund të paragjykohet se si do të deklarohen të pandehurit dhe si rrjedhojë u vendos që kjo seancë të vazhdojë më 9 tetor.
Discussion about this post