Momente hiri, gëzimi dhe shenjtërie dje në Katedralen e Shën Shtjefnit në Shkodër. Atë Luigj Palaj dhe Dom Gjon Gazulli u shpallën të lumë. Në Meshën e kryesuar nga Prefekti i Dikasterit të Vatikanit për çështjen e Shenjtërve Hirësia e Tij, Imzot Marcello Semeraro u bë leximi i dekretit të Papa Françeskut i cili vuloste zyrtarisht luminimin e këtyre dy martirëve të cilët dhanë jetën për Fe e Atdhe.
Mijëra besimtarë të ardhur nga Shqipëria, Kosova, Mali Zi dhe Kroacia e kthyen qytetin e Shkodrës në kryeqendër të Kishës ballkanike.
Me këtë rast , Dom Mark Pashkja, zëdhënës i Kishës deklaroi se “Dielli i Nëntorit dukej sikur demonstronte ngrohtësinë hyjnore që karakterizonte mbarë Kishën Shqiptare në këtë ditë. Ngrohtësi që buronte nga dëshmia e flaktë e këtyre dy martirëve që dhanë jetën për Krishtin dhe për Kishën”.
Në homelinë e tij Kardinali Semeraro nxiti të pranishmit që të përfitonin nga dëshmia e këtyre personazheve për të jetuar një fe e cila sjellë vepra konkrete në jetën e përditshme dhe në mbarë shoqërinë Shqiptare dhe jo vetëm.
Në përshëndetjen e tij Imzot Angelo Massafra falënderoi zyrtarisht Papa Françeskun për këtë dhuratë dhe theksoi dëshminë historike të Kishës tonë shqiptare në të gjitha kohërat. Kisha jonë edhe pse e vogël në numër gjatë gjithë kohës ka ditur të dëshmojë nëpërmjet martirëve të saj vitalitetin dhe lidhjen e saj me Selinë e Pjetrit, nënvizoi ai.
Të pranishëm në këtë meshë ishin hierarkët më të lartë të Kishës nga Kroacia, Bosnja dhe Mali i Zi. Vlen të përmendet edhe prania e komuniteteve të tjera fetare, autoriteteve civile, si edhe ajo e vëllezërve Ortodoks të cilët u përfaqësuan me Hirësinë e tij Imzot Asti Bakalbashin, Arqipeshkvin e sapozgjedhur të Beratit dhe Vlorës.
Ndërkohë, pas lutjes së Engjëllit, Françesku kujtoi lumnimin e dy martirëve, Paliq dhe Gazulli, në Shkodër, dhe të gjermanit Metzger, si dhe vendet që vuajnë nga konfliktet, nga Ukraina në Sudan, duke nënvizuar se “lufta na bën çnjerëzorë, na bën të tolerojmë krime të papranueshme”. Më pas u bashkua në lutjen për viktimat e abuzimit nga Kisha Italiane, “e domosdoshme” për të rivendosur besimin e tradhtuar.
gijotina.com/
Discussion about this post