Ministri i Drejtësisë, Ulsi Manja, u kthye në “skenën e krimit” më 17 korrik 2025, në Mëzez të Tiranës, ku ka nisur ndërtimi i një burgu të ri për të miturit. Paralelisht në Gjykatën e Lartë vendosej data për gjyqin kundër institucionit të tij, të hapur nga tri kompani pikërisht për tenderin e burgut.
Duket sikur ministri shkoi aty për të varrosur dosjen e pambyllur, ku akuzohet haptazi për korrupsion në favor të një prej kompanive që ka pas oligarkun Bashkim Ulaj.
Ministri i Drejtësisë, Ulsi Manja, duke inspektuar punimet në kantierin e Institutit të ri për Edukimin dhe Rehabilitimin e të Miturve, që po ndërtohet në Mëzez të Tiranës
Gjyqi që vazhdon prej dy vjetësh mes bizneseve dhe Ministrisë së Drejtësisë ndodhet në fazën e shqyrtimit paraprak (Dhomë Këshillimi) në Kolegjin Administrativ të Gjykatës së Lartë. Tashmë është mësuar se në datën 2 tetor 2025 do të mbahet seanca ku palë paditëse janë shoqëritë “Rafin Company” shpk, “Ndregjoni” shpk, “Udha” shpk. I paditur në këtë gjyq është Komsioni i Prokurimit Publik, që drejtohej nga Jonaid Myzyri (tashmë i pandehur nga SPAK për korrupsion metenderat) dhe Ministria e Drejtësisë, që vazhdon të drejtohet nga Ulsi Manja.
Çfarë kërkojnë bizneset nga Gjykata e Lartë?
“Shfuqizimi i vendimit te Komisionit te Shqyrtimit te Ankesave, pranë Ministrisë së Drejtësisë Nr.6799/5, datë 19 dhjetor 2023”, shkruhet në padinë e 4 kompanive kundër Ulsi Manjës. Më tej kërkohet “Shfuqizimi i vendimit të Komisionit të Vlerësimit të Ofertave datë 7 nëntor 2023 për Kualifikimin e ofertës së paraqitur nga Bashkimi i Operatoreve Ekonomik Shoqëria “4-AM & Shoqëria “Ed Construksion” sh.p.k, në procedurën e prokurimit “Procedure e hapur mbi kufirin e lartë monetar”, me Nr. REF-80277-09-18-2023, me objekt:” Ndërtimi i Institucionit për Edukim dhe Rehabilitim të të Miturve”, me fond limit 1,924,332,544 lekë (pa tvsh)”. Bëhet fjalë për tenderin e zhvilluar në datë 19 tetor 2023 në ambientet e Ministrisë së Drejtësisë. Padia kërkon detyrimin e ministrisë të vijojë me hapat e tjerë të procedurës së prokurimit, që më tej e ka marrë në dorë Jonaid Myzyri, kryetari i KPP-së, që është shkarkuar nga SPAK.
Nga dosja mësojmë se kërkohet edhe shfuqizimi i vendimit të Komisionit të Prokurimit Publik, nr. 489/2024, datë 10 maj 2024 për shkak se vjen në kundërshtim me ligjin. Po ashtu, këmbëngulet në “Detyrimin e Komisionit të Prokurimit Publik të kryejë veprimet përkatëse në kthimin e vlerës 9,621,663 lekë në llogari të shoqërisë “RAFIN COMPANY” shpk, që janë paguar si tarifë për çështjen në KPP si dhe shpenzimet e tjera që kompanitë kanë bërë për shkak të kësaj padrejtësie.
Jonaid Myzyri favorizoi kompaninë e oligarkut
Komisioni i Prokurimeve Publike favorizon oligarkët kur shqyrton denoncimet për tenderat e mëdhenj. Këtë radhë nuk ka bërë përjashtim edhe interesi i ndërtuesit dhe manjatit të mediave Bashkim Ulaj. Bosi i “Gener 2”, televizionit A2 dhe i disa kompanive të tjera të ndërtimit, përfshirë “4 AM”, ka përfituar nga ministri Ulsi Manja kontratën e majme për ndërtimin e burgut të miturve.
Një përshtypje të tillë të jep afera e ngritur mbi tenderin me objekt ‘Ndërtimi i Institucionit për Edukim dhe Rehabilitim të të Miturve”, me një fond limit 1,924,332,544 lekë të reja (pa TVSH). Siç shihet, gara për këtë tender është mbyllur duke shpallur fituese firmën “4 AM” e Bashkim Ulajt, e cila në letra ka pronar Ardit Metaliajn.
Në fazën e parë në tender kanë marrë pjesë 5 kompani, ku katër prej tyre u përjashtuan nga komisioni vlerësues menjëherë dhe fitues është shpallur bashkimi i kompanive “4 A-M” dhe “ED KONSTRUKSION” me pronar kryesor Alfred Ibrahimin.
Ministri Ulsi Manja e ka firmosur kontratën në mungesë të një konkurrence minimale. Menjëherë tenderi është denoncuar në KPP.
Më datë 6 dhjetor 2023, Bashkimi i operatorëve ekonomikë “Rafin Company” SHPK & “Ndregjoni” SHPK & “Udha” SHPK ka dorëzuar ankesën me denoncimin publik se ky tender është dhuruar për “përfitime personale”. Pra është një denoncim i hapur për korrupsion, të cilin SPAK mund ta marrë të gatshëm dhe ta fusë në dosjen e Ulsi Manjës kur t’i vijë ora për ta hetuar.
Në ankesë ngrihen pretendime për mos përmbushje nga ana e bashkimit të operatorëve ekonomikë “4 AM” SHPK & “ED Konstruksion” SHPK, të kritereve. Sipas denoncuesit, firmat fituese nuk kanë paraqitur dokumentet në kohë dhe nuk kanë të deklaruar të gjithë stafin e nevojshëm që duhet për të kryer këtë shërbim. Gjithashtu, theksohet se Autoriteti Kontraktor i ka lejuar që t’i dorëzojnë dokumentet dorazi pas afatit.
“Haptazi dhe në shkelje flagrante të ligjit Komisioni i Vlerësimit të Ankesave ka favorizuar në këtë procedurë prokurimi me qëllim përfitime personale duke kualifikuar BOE “4- AM” shpk dhe “ED Konstruksion” SHPK pa plotësuar kriteret dhe pa dorëzuar dokumentacionin e kërkuar si dhe duke pranuar dokumente shtesë (fizikisht) jashtë afateve kohore të pranimit të dokumentacionit”, thuhet në ankesë.
Pas këtyre pretendimeve për shkelje të rënda dhe që cenojnë hapur konkurrencën, KPP ka gjetur “kohë” për këtë çështje vetëm pas 6 muajsh! Tani me siguri këto para ishin xhiruar në arkën e kompanisë së Ulajt dhe asgjë nuk kishte më efekt.
Gjithsesi shohim që më datë 10 maj 2024 është mbledhur komisioni për të shqyrtuar këtë çështje dhe nuk ka pranuar kërkesën duke e lejon Ministrinë e Drejtësisë të vazhdojë me procedurat.
Aktualisht, Jonaid Myzyri është në pritje të përfundimit të hetimeve të SPAK për korrupsion me tenderat, ndërsa Ulsi Manja nuk u rikonfirmua ministër në kabinetin “Rama 4”, por është deputet dhe shijon të mirat e pushtetit. Vendimi i vonuar i gjykatave, pavarësisht se si do të jetë, kontribuoi në mbështetje të ministrit dhe të oligarkut, që tashmë po vijojnë me projektin e burgut, pavarësisht se çështja ishte akoma në shkallët e gjyqësorit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post