Njihuni me hakerat ukrainas që “po luftojnë” Rusinë nga shtëpitë e tyre

Ndërsa lufta po zhvillohet jo shumë larg tij në Kharkiv, Serhii po zhvillon një betejë nga shtëpia e tij, i rrethuar nga një komoditet i plotë.

Në dhomën e tij në Sumy, vetëm 20 kilometra nga Rusia në veri-lindje të Ukrainës, 33-vjeçari ka gjithçka që nevojitet për të bërë një koktej molotovi. Por, për momentin, ai nuk po nis një luftë të tillë kundër Moskës.

Në vend të kësaj, ai po merr pjesë në sulmet dixhitale të qeverisë ukrainase ndaj Rusisë, që synojnë mbylljen e faqeve të internetit të qeverisë ruse dhe ndërprerjen e aftësisë së Moskës për të shkëmbyer informacione.

Kur shpërtheu agresioni rus mbi Ukrainë, Kievi hapi një kanal në Telegram të quajtur “Ushtria IT e Ukrainës”, e cila ndan informacione se si dhe çfarë infrastrukture dixhitale ruse të sulmojë.

Dhe Serhii, një zhvillues softuerësh, vendosi të përdorë aftësitë e tij. Ushtria ruse e rrethoi Sumy-n për disa ditë dhe Serhii tha se mund të dëgjonte bombardimet nga dritaret e tij. Para agresionit, ai kishte një pikëpamje më neutrale për Rusinë dhe madje fliste rusisht si gjuhën e tij të parë.

“Por pas asaj që ka ndodhur, unë kam kaluar në ukrainisht”, ka rrëfyer ai. “Duket se askush në Rusi nuk e kupton zemërimin tonë pas asaj që ndodhi në Mariupol dhe Bucha”.

Slava Banik është në krye të “Ushtrisë së hakerëve të Ukrainës” në Ministrinë e Transformimit Dixhital të Ukrainës. Ai thotë se nisma është një nga mënyrat e shumta që qeveria po lufton kundër Rusisë.

Dhe ai pretendon se më shumë se 300,000 njerëz – jo vetëm ukrainas – po marrin pjesë në këtë ushtri, duke u përpjekur të pengojnë përpjekjet ruse. Sipas tij, një mënyrë është mbingarkimi i faqeve ruse të internetit me trafik të padëshiruar, duke i nxjerrë ato jashtë linje.

Është një taktikë e thjeshtë që qytetarët e zakonshëm mund ta përdorin, dhe ajo synon bankat ruse, faqet e internetit qeveritare, mediat, madje edhe dyqanet dhe shërbimet e transmetimit.