Koha që fëmijët kalojnë me video-lojëra në internet është kthyer në një shqetësim për specialistë e shëndetit mendor dhe fizik, për shkak të efekteve që jep. I pari shtet që merr masa drastike për këtë fenomen është Kina, e cila ka vendosur që fëmijët mund të kalojnë vetëm 3 orë në javë para ekranit të kompjuterit.
Sipas rregullave të reja të publikuara nga Administrata Kombëtare e Shtypit dhe Publikimit e Kinës, fëmijët dhe adoleshentët deri në 18 vjeç, do të lejohen vetëm deri në tre orë në javë për të luajtur video-lojëra në internet.
Ky vendim ka ardhur si një mënyrë për të mbrojtur shëndetin fizik dhe mendor të fëmijëve, por duket se nuk është përkrahur nga qytetarët. Nga ana tjetër një goditje marrin edhe gjigandët e teknologjisë në video-lojërat, pasi vihet në pikëpyetje e ardhmja e kompanive të tyre.
Sipas këtij vendimi, personat nën 18 vjeç do të lejohen të luajnë video-lojëra një orë në ditë nga ora 20:00 deri në orën 21:00.
