Skuadra e Liverpulit do të përballet me Atletikon e Madridit këtë të martë në ligën e kampionëve. Trajneri i ekipit anglez, Jurgen Klop ka analizuar vigjiljen e këtij dueli ndërsa është ndalur edhe tek polemikat e krijuara në sfidën e vitit të kaluar ku akuzoi spanjollët si një skuadër që dinë vetëm të mbrohen.
“Isha i inatosur dhe i zhgënjyer për shumë gjëra. Por kemi luajtur kundër një skuadre të mbushur me lojtarë të klasit botëror që u mbrojt në mënyrën më të mirë të mundshme. Simeone ka bërë gjithçka siç duhet, është kampion i Spanjës dhe di se si të menaxhojë grupin, që lufton deri në vdekje. Nuk mund të bëj asgjë tjetër veçse ta respektoj.
Loja e tyre? Më pëlqen një stil ndryshe futbolli. Padyshim ai i Atletikos është fitues, ka ndryshuar edhe modul e ka kthyer në shtëpi disa futbollistë. Kanë shenjën e dukshme të një skuadre dhe mund të fitojnë përsëri kampionatin”, theksoi trajneri i skuadrës së Liverpulit, Jurgen Klop.
