Teksa vendi është duke u përballur me krizën ekonomike, energjetike, e sociale, qeveria vazhdon të keqpërdorë buxhetin e shtetit. Rreth 1.2 miliard lekë nga buxheti i shtetit do të përdoren për blerje të automjeteve të reja, që u takojnë institucioneve publike. Ky vendim është abuzues, pasi nga ana tjetër qeveria ka shpërndarë një fond shumë më të ulët për gjërat vërtet të nevojshme, si shëndetësia, pensionistët, personat në nevojë, të përndjekurit për pronarët që presin të shpronësohen.
Sipas tabelës së investimeve, mjetet i kanë kërkuar kryesisht institucionet e pavarura si Prokuroria e Përgjithshme, Shërbimi Informativ Shtetëror, Gjykata Kushtetuese, institucionet e reja të drejtësisë dhe Agjencia për Median dhe Informimin, e krijuar së fundmi nga qeveria Rama.
SHISH do të shpenzojë për mjetet e transportit rreth 198 milionë lekë, institucionet e reja të drejtësisë 95.4 milionë lekë, Gjykata Kushtetuese 3 360 mijë lekë dhe Agjencia për Median dhe Informimin 7 milionë lekë.
Brenda këtij fondi përfshihet dhe blerja e autoambulancave për shërbimin e urgjencës me një vlerë prej 85 milionë lekësh dhe blerja e automjeteve për burgjet, vlera e të cilave arrin 225 milionë lekë.
Institucione të tjera që kanë parashikuar blerje të makinave janë Garda e Republikës, Ujësjellës Kanalizime Kamëz, Inspektorati Shtetëror i Mbikëqyrjes së Tregut, Drejtoria e Përgjithshme e Përmbarimit dhe Agjencia e Punësimit.
Por shpenzime luksi nuk janë vetëm automjetet, jashtë kërkesave nuk ka mbetur as rinovimi dhe mobilimi i zyrave.
Vetëm për blerje orendish dhe pajisjen parashikohen fonde që shkojnë në rreth 2 miliardë lekë.
Nga lista e investimeve bëhet e ditur se më shumë do të shpenzohen për blerjen e pajisjeve dhe orendive të zyrave për Qendrën e Furnizimit të Materialeve Teknike në Ministrinë e Brendshme në vlerën e 307.8 milionë lekëve.
Ndjekur më pas për blerjen e pajisjeve për zyrat e Ministrisë së Brendshme dhe blerjet e mobiljeve dhe pajisjeve për shkollat e arsimit profesional, të cilat arrijnë 166 milionë lekë.
Në projekt-buxhetin e ri është menduar dhe për rikonstruksionin e disa zyrave dhe qendrave shëndetësore dhe godinave që kapin shifrën e rreth 2 miliardë lekëve.
