Gazeta e njohur amerikane ‘The Boston Globe’, e cila ishte fokusi në filmin e njohur amerikan të vitit 2015, ‘Spotlight’, i ka kushtuar një vëmendje akuzave të bëra ndaj ish-ministrit shqiptar të Mbrojtjes, Fatmir Mediut për çështjen “Gërdeci”.
Gazeta investigative, shkruan se ndaj ish-ministrit të mbrojtjes janë ngritur akuza që lidhen me një shpërthim masiv të ndodhur në një fabrikë në vitin 2008, ku mbetën të vdekur 26 persona dhe u plagosën qindra të tjerë.
“Prokurorët shqiptarë ngritën të enjten akuza kundër një ish-ministri të Mbrojtjes lidhur me një shpërthim masiv në një fabrikë municionesh në vitin 2008 që vrau 26 persona. Struktura e Posaçme Kundër Korrupsionit, ose SPAK, e ngarkuar me hetimin e zyrtarëve të lartë, tha se kishte akuzuar Fatmir Mediu, ministër i Mbrojtjes në vitet 2005-2008, për shpërdorim të detyrës. E njëjta akuzë u hodh në vitin 2009 për shkak të imunitetit të tij nga ndjekja penale si deputet i rizgjedhur në parlament. Një gjykatë shqiptare vendosi në shtator për të rihapur çështjen. Mediu është ende deputet i një partie opozitare, por imuniteti parlamentar nga çështjet penale u hoq në vitin 2012”, shkruhet në gazetë.
Gazeta thotë gjithashtu se Mediu ka mohuar të jetë përgjegjës për ngjarjen e rëndë, ndërsa shkruan se çështja u rihap pas kërkesës së prindërve të një djali 6-vjeçar i cili u vra teksa luante në oborrin e shtëpisë.
“Mediu ka mohuar keqbërjen, duke e quajtur masën të motivuar politikisht. Çështja rifilloi pas një kërkese të prindërve të një djali 6-vjeçar i cili u vra teksa luante në oborrin e shtëpisë së tyre në Gërdec, jashtë kryeqytetit, Tiranë, në shpërthimin e 15 marsit 2008. Shpërthimi vrau 26 njerëz, plagosën 264 dhe dëmtuan rreth 5500 shtëpi. Në vitin 2012, një gjykatë dënoi dhe burgosi 19 persona për shpërthimin, por të afërmit e zemëruar të viktimave u ankuan se zyrtarë të lartë të qeverisë i kishin shmangur drejtësisë”, shkruhet ndër të tjera.
“Boston Globe” është një gazetë e përditshme amerikane e themeluar dhe me qendër në Boston, Massachusetts. Gazeta është shënuar si “një nga gazetat më prestigjioze të vendit”. Në vitin 1967, Boston Globe u bë gazeta e parë e madhe në SHBA që doli kundër Luftës së Vietnamit. Redaktor i The Boston Globe është Brian McGrory , i cili mori kryesimin në dhjetor 2012.
