Trajneri i Tiranës, Orges Shehi ka treguar se ku ndryshon sipas tij derbi me Dinamon nga ai me Partizanin.
Në konferencën për mediat në prag të takimit për fazën e 1/8-ave me ‘Blutë’ e kryeqytetit, tekniku i ‘Bardhebluve’ u shpreh se ndryshimi i vetëm në ndeshjet me këto dy skuadra është impakti te tifozët.
“Ndryshimi i vetëm është që ka impakt tek njerëzit dhe tifozët, sepse jetohet me shumë rivalitet derbi me Partizanin dhe për shkak se Dinamo ka pasur edhe një shkëputje prej 9 vitesh që Dinamo nuk ishte një skuadër që pretendon dhe kjo e ka zbehur disi rivalitetin. Janë dy skuadra me histori i vetmi ndryshim është përjetimi që ka tek lojtarët dhe tifozët.”-tha ai
Më tej tekniku foli edhe për mungesat duke theksuar se në sfidën e radhës nuk do ketë Tolin e Ngoo-n, përveç Ismajlgecit.
“Problem quaj dëmtimin e Ismajlgecit, e di që kam mungesë Tolin dhe Ngoo për shkak të kartonëve, por mungesa e Ismajlgecit na shton problemet. Ky është problemi që unë kam dhe jo merkato, sepse është diçka që zgjidhet. Është shqetësuese gjendja e Ismajlgecit sepse dëmtimet nuk po e lënë që ai të shfaqet në realitet ashtu siç është. Ai lojtar që unë mendoj që është një nga më të mirët në Shqipëri dhe ky vit mendoj se do të jetë i tiji për të bërë dhe hapin e madh. Shpresojmë që ta rikuperojmë në kohë, kjo falë dhe mjekëve që po e mbajnë në kujdes të jashtëzakonshëm për ta rikuperuar, por çdo dëmtim ka ditët e veta dhe nuk duam ta rrezikojmë.”-shtoi tekniku.
Kjo ndeshje do të zhvillohet të mërkurën në orën 16:45 në stadiumin ‘Air Albania’ dhe pritet të ketë interes të lartë nga tifozeritë./K.T/Gijotina.com
