Basha: Berisha zëvendësoi telenovelat turke, unë nuk di të ndërroj brava

Kryetari i Partisë Demokratike Lulzim Basha në deklaratën e tij për mediat pas hyrjes së Berishës në selinë blu sëbashku me mbështetësit e tij, ka ironizuar se paraardhësi i tij ka tre muaj që ka zëvendësuar telenovelat turke, të cilat sipas tij nuk i shërbejnë demokracisë. Ai ka akuzuar Berishën se po shkel hapur statutin dhe ligjin për partitë politike, me synimin e vetëm mbrojtjen e interesave të tij personale. Ai ka sjellë në vëmendje dhe qëndrimin e zyrtarëve të SHBA-së ndaj Berishës, ku thekson se tre ditë më parë SHBA u shpreh se me Berishën në krye kjo forcë politike merr fund.

“Berisha ka tre muaj që ka zëvendësuar telenovelat turke. Kujt i shërben kjo telenovelë? I shërben demokracisë? Jo. I bëjnë shantazh njerëzve për të mbushur formularët për tubimin e arenës së Hajnisë. Sjellja e pardjeshma dhe e sotme është kur ti shkel në mënyrë të hapur statutin dhe ligjin për partinë politike vetëm se do ta marrësh partinë peng për interesat e tua. SHBA e tha tre ditë më parë që me ty kjo parti merr fund. Sali Berisha e provoi sot se nuk i intereson demokracia sepse nuk i intereson opozita. Qeveri ka dhe diktatura. Opozitë nuk ka ka diktatura”, tha Basha.

Lidhur me akuzat se ka ndërruar bravat e dyerve të zyrave, ku Belind Këlliçi e akuzoi drejtëprdrejtë se i ka vjedhur zyrën, Basha u përgjigj se ai nuk merret me ndërrim bravash.

“Po se more përgjigjen do rrish deri në dy të natës derisa kur të marrësh përgjigjen. Nuk merret kryetari i Partisë Demokratike me bravat. Ndoshta te Syri Tv merret Berisha me bravat. Si mund të pranosh të bësh pyetje për bravat. Unë nuk di të rregulloj asnjë bravë. “

Akuzave të Berishës se Basha ka marrë përforcime që dy ditë më parë për të mbajtur me dhunë selinë blu, Basha i është përgjigjur duke thënë se ka dokumente dhe qëndrime zyrtare të PD-së, të cilat i paraprijnë skenarëve të mundshme nga ajo që ai e cilëson si trekëndëshi i Bermudës.

“Ka dokumente dhe qëndrime zyrtare të Partisë Demokratike. Duke menduar që trekëndëshi i Bermudës mund të mendonte çdo skenar ka marrë parasysh çdo gjë”, deklaroi ai.