Zona e ish-fushave të aviacionit në Vlorë, prej kohësh është kthyer në një vend grumbullim mbeturinash. Problemet që kjo zonë ka janë të shumta, duke shtuar këtu rrugën e amortizuar, mungesën e ndriçimit apo edhe problemet me ujin e pijshëm.
Prej 22 vitesh nuk vihet më dorë, pasi hera e fundit në të cilën është investuar në këtë zonë është viti i largët 1999. Mbi 1000 familje përballen çdo ditë me ndotjen, por dhe me problematikat e tjera të cilat tashmë janë kthyer në një “mjet” jetese, i pashmangshëm.
Zona në fjalë, e cila i përket lagjes “Kushtrim” sipas hartës territoriale, banohet nga qytetarët të ardhur nga rrethet e tjera të Shqipërisë. Njihet ndryshe me emrin “Vlora e dytë”, kjo si rrjedhojë e numrit të madh të familjeve të vendosura aty. Shpresa për një jetë më të mirë, duket se nuk është realizuar në lagjen e tyre, pasi pamja që ofrohet të pret totalisht shpresat.
Për banorët, në lagje nuk mund të marrësh dot frymë, pasi aroma është e keqe dhe për shkak të ndotjes mund të shkaktohen infeksione të ndryshme. E vetmja zgjidhje sipas tyre, mbetet largimi.
Bashkia e Vlorës, duket se e ka harruar edhe këtë lagje të qytetit, ashtu si shumë të tjera!
