Bashkia Shkodër ka dhënë një tender për sistemimin e asfaltimit të rrugëve të brendshme të fshatit Hot i Ri, duke akorduar një fond limit prej 3,626,355 lekë të reja ose mbi 37 milionë lekë të vjetra. Ajo që vërehet në dokumentin e publikuar është mënyra e shpalljes së fituesit, që në këtë rast është subjekti “A.ARENS” sh.p.k, një ndër katër operatorët pjesëmarrës në garë. Por ndryshe nga fituesi, tre operatorët e tjerë janë skualifikuar automatikisht nga gara, duke e cilësuar tenderin me “red flag’, për shkak të shkeljes së barazisë në garë dhe ligjit të konkurrencës, që duhet ndjekur për të shpallur fituesin e një tenderi.
Në argumentim thuhet se tre operatorët e tjerë janë skualifikuar për këto arsye: Delia Impex”sh.p.k, nuk ka paraqitur asnjë dokumentacion kualifikues për këtë procedurë prokurimi.
“Sark” sh.p.k, Drejtuesi teknik E.S dhe V.P referuar listëpagesave të muajit shtator nuk figurojnë të punësuar me kohë të plotë në kundërshtim me kriteret e vendosura në DST. “ SMO Vataksi”sh.p.k është përjashtuar pasi mjetet dhe stafin drejtuesi janë të angazhuara në të tjera kontrata po me Bashkinë e Shkodrës.
Tenderi më numër reference REF-13358-11-26-2021, i është dhënë operatorit “A.ARENS” sh.p.k, operator i cili rezulton fitues i shtatë tenderave në Bashkinë e Shkodrës. Në hulumtimet e bëra rezulton se ky operator ka fituar një tjetër tender me objekt Rikontruksion Blloku i Pallateve “Osja Falltores” (krahu i majtë), me numër reference REF-80847-12-02-2020. Në këtë tender me fond limit 1 681 242 lekë të reja ose rreth 17 milionë lekë të vjetra, operatori “A.ARENS” sh.p.k ka garuar i vetëm duke u shpallur fitues në shkelje të hapur të ligjit të konkurrencës, ndaj ky tender është klasifikuar me “red flag”, për mungesë konkurrence.
Ndërkohë veçmas këtyre dy tenderave të klasifikuara me “red flag”, rezulton se ky operator në tre tendera të tjerë ka garuar me të njëjtin operator, saktësisht “Delia Impex”sh.p.k. Ky i fundit në dy tenderat fituese nga kompania “A.ARENS” sh.p.k, nuk ka paraqitur asnjë dokument apo ofertë, duke i lënë rrugën e hapur për të fituar garën operatorit në fjalë. Konkretisht janë këto dy tendera:
Objekti i tenderit: Sistemim – Asfaltim Degëzim I rrugës “Gjomarkaj”, me numër reference REF-08635-10-18-2021 dhe fond limit 2 361 128 lekë të reja ose mbi 24 milionë lekë të vjetra, si dhe tenderi me objekt Rikonstruksion Rruga e “Myzyrit”, me numër reference REF-79523-11-23-2020 dhe fond limit 2.020.900 lekë të reja ose rreth 21 milionë lekë të vjetra.
Ndërsa në një tjetër tender, kompania “A.ARENS” sh.p.k ka garuar sërish me të njëjtin operator si mësipërm, pra “Delia Impex” sh.p.k. Bëhet fjalë për tenderin me objekt Rikonstruksion degëzim Rruga “Ibrahim Rugova, me numër reference REF-80853-12-02-2020 dhe fond limit 1.748.166 lekë të reja ose rreth 18 milionë lekë të vjetra. Këtë herë në dokumentacion nuk saktësohet arsyeja e humbjes së garës nga kjo kompani dhe madje nuk ka pasur as ankimim nga kjo e fundit.
Bazuar në këto të dhëna ku ligji i konkurrencës shkelet hapur në dy tendera dhe në tre të tjerë garohet përballë së njëjtin operator që nuk paraqet ofertë për tenderin, ngjallen dyshime se fituesi është i paracaktuar dhe pjesëmarrja e vetëm një operatori që nuk paraqet asnjë dokumentacion të kërkuar është fiktive. Të gjitha këto tendera janë dhënë nga Bashkia Shkodër, institucion i drejtuara nga Voltana Ademi.
Discussion about this post