Protesta për dorëheqjen e Erion Veliajt, paraqitja e tij në SPAK dhe deklaratat e kryebashkiakut përbënë lajtmotivin e fjalimit të kryedemokratit Sali Berisha, në protestën e përditshëm poshtë banesës së tij.
Berisha e nisi fjalën duke përshëndetur protestuesit. Ai tha se qytetarët e filluan ditën duke pritur “kryehajnin e Tiranës” siç e meritonte dhe e vazhduan me protestën e mosbindjes civile “më të madhen që nga viti 1991”.
Lideri i opozitës komentoi thirrjen në SPAK të kryebashkiakut të Tiranës, Erion Veliaj dhe deklaratën e këtij të fundit, duke i quajtur “kolegë” hetuesit e BKH-së dhe prokuroët e SPAK. Berisha u shpreh se “kryehajduti i Tiranës shkoi te Skapi i partisë si kryeinspektor i drejtësisë”.
Kryetari i Partisë Demokratike theksoi se “kryebashkiaku hajdut i Tiranës”, Erion Veliaj u thirr në SPAK falë “protestës së vendosur të qytetarëve të lirë”, të cilët kërkojnë largimin e tij pas publikimit të aferës “5D”.
“Ju e dëgjuat vetë se si Erion Veliaj u tha shqiptarëve se isha te kolegët dhe bashkëpunëtorët dhe se i përgëzoj se po punonin mirë. Pra, kryehajduti i Tiranës shkoi te Skapi i partisë si kryeinspektori i drejtësisë. E kuptoni ju vetë se çfarë poshtërimi i bëri ky Skapit të partisë. Ky kryehajdut i bashkisë. Por mos harroni se ky e shprehu haptas: isha te bashkëpunëtorët.
Nuk ka të vërtetë më të madhe, vjedhjet i kanë të përbashkëta. Bashkëpunimi i tyre i vetëm është vjedhja, abuzimi dhe mbrojtja e krimit. Edhe kjo është një pjesë e qenësishme e fitores tuaj sot. Sepse sot, prapë ju hapët sytë edhe shqiptarëve më skeptikë se kush është Erion Veliaj dhe ç’është Skapi i partisë. Të dashur miq! Erion Veliaj është i amnistuari i madh i Altin Dumanit dhe organizatës së tij kriminale. Ai u thirr sot atje falë meritës suaj, sepse Dumani e di se po i vjen shpejt radha”, tha Berisha.
Ai i bëri thirrje policisë që të mos përdoret nga “banda e hajdutëve në pushtet”. Berisha tha se, policia duhet të vetëpërmbahet dhe “të mos bëhet mish për top për bandën në pushtet”.
Duke folur për protestën e radhës para Bashkisë së Tiranës, e cila do të mbahet të martën në orën 11:00, ai tha se kjo javë “na shërben për tu përgatitur për sulmin total”.
“Kjo javë na shërben për t’u përgatitur për sulmin total. Sulmin e pandërprerë gjer në fitore”, tha Berisha.
Discussion about this post