Ministrja e Financave dhe Ekonomisë Delina Ibrahimaj ka paralajmëruar se çmimet e produkteve të ndryshme mund të rriten sërish. Në një konferencë me gazetarët, ministrja shkoi me deklaratën, kur tha se ekziston mundësia e rritjes së çmimit të karburanteve, pasi është duke u diskutuar rritja e tarifës së pompimit në interes të koncensionarit.
Ibrahimaj tha para gazetarëve se në marrëveshjen me këtë koncensionar, ekziston klauzola që ai të kërkojë rishikimin e tarifave, në baze të ndryshimeve në treg, duke justifikuar kështu një rritje të mundshme.
Sipas ministres, në dikasterin që ajo drejton është ngritur një grup pune, që po analizon kërkesën e koncensionarit të pompave, ndërsa nuk pranoi të komentonte lidhur me faktorët që çojnë koncensionarin drejt kërkesës për rritjen e tarifave.
“Unë të falenderoj për pyetjen sa i takon koncensionit për pompat, ne kemi një kontratë koncensoonare që në elementët e saj i jep të drejt koncensionari që të kërkojë rishikimin e tarifave, nëse vlerëson apo ka baza që kushtet kanë ndryshuar. Jemi në rastet kur koncensionari ka bërë një kërkesë, Ministria ka ngritur një grup pune, ku po vlerësojmë nëse jemi në kushtet e ndryshimit të tarifave. Nuk ka asnjë nismë të Ministrisë për ndryshimin e tarifave, dhe aq më keq për dyfishimin e tyre”, tha ministrja.
Vetëm pak ditë më parë qytetarët shqiptarë u njoftuan për skandalin e rritjes me shifra marramendëse të çmimit të naftës, në një kohë ku po përballeshin edhe me rritjen e çmimeve të produkteve e shërbimeve të përditshme jetësore. Në pikat me pakicë, nafta rezulton e shtrenjtuar ku një litër po tregtohet me 193 lekë, duke pësuar një rritje me më shumë se 5 lekë për litër.
Discussion about this post