Regjistrimi online i nxënësve në shkolla ka sjellë paqartësi dhe kaos te prindërit të cilët janë mbledhur përpara zyrës arsimore për të kërkuar më shumë informacion. Sipas procedurave të përcaktuara nga Ministria e Arsimit, prindërit duhet të bënin aplikimin online nga data 15 – 30 gusht në e-albania, ku duhet të plotësonin të dhënat e nevojshme të formularit.
Nxënësit lejohet të regjistrohen në institucionin arsimor publik që mbulon vendbanimin e tyre, ndërsa kur fëmija do të regjistrohet në një shkollë jashtë zonës së banimit atëherë prindërit duhet të parashtrojnë arsyen gjatë aplikimit.
Mësohet se, këtu mund të qëndrojë problemi lidhur me kaosin e shkaktuar pasi nëse në vendbanim ndodhen tre shkolla fillore, dhe njëra prej tyre ka mbushur limitin e nxënësve, atëherë, janë dy shkollat e tjera që bëjnë përzgjedhjen e këtyre të fundit. Kështu, krijohet kaos me pranimin e nxënësve në shkolla, duke bërë që prindërit t’i drejtoren zyrave arsimore për më shumë informacione.
Viti i ri shkollor nis më 23 shtator, ndërsa sot nisi mësimi plotësues për të gjithë nxënësit që kanë nevojë të bëjnë një përsëritje të dijeve të tyre.
