UEFA po shqyrton mundësinë e nisjes së një hetimi ndaj presidentit të FIFA-s, Gianni Infantino, për një çështje që lidhet me periudhën e tij në drejtimin e futbollit evropian.
Në qendër të raportimeve është një pagesë gjashtëshifrore që një ish-punonjëse e UEFA-s dyshohet se ka marrë pas largimit nga organizata.
Sipas raportimeve, gruaja kishte pasur një marrëdhënie me Infantinon gjatë kohës kur ai shërbente si sekretar i përgjithshëm i UEFA-s.
Dyshimet lidhen me mënyrën se si është miratuar paketa financiare dhe nëse ka pasur konflikt interesi.
Ish-punonjësja raportohet se kishte avancuar në karrierë gjatë kësaj periudhe, duke marrë edhe një rritje të konsiderueshme page.
UEFA ka konfirmuar se pagesa është bërë, por këmbëngul se ajo ishte në përputhje me rregullat e kohës.
Institucioni ka theksuar gjithashtu se politikat për marrëdhëniet mes punonjësve dhe kompensimet janë forcuar më pas.
Sipas një burimi të cituar nga “The Telegraph”, Infantino nuk duhej të kishte rol në miratimin e paketës për shkak të konfliktit të mundshëm të interesit.
Në këtë histori përmendet edhe financimi i një programi MBA për ish-punonjësen, me tarifa vjetore që arrinin rreth 45 mijë paund.
FIFA, ndërkohë, i ka mohuar kategorikisht akuzat, duke i cilësuar pretendimet si “tërësisht të pavërteta”.
Çështja rikthehet në një periudhë tensionesh mes FIFA-s dhe UEFA-s për disa iniciativa të Infantinos.
UEFA raportohet se ka kundërshtuar unanimisht një propozim për përfshirjen e investitorëve privatë në financimin e Botërorit.
Pavarësisht polemikave, Infantino synon të kërkojë një tjetër mandat në krye të FIFA-s, me zgjedhjet e ardhshme të parashikuara për mars.
Discussion about this post