Mashtrohet kryeministri britanik, Burnham shkëmbeu mesazhe me personin që hiqej si shefja e stafit të Trump

Kryeministri britanik, Andy Burnham. shkëmbeu mesazhe me një person që shtirej si shefi i stafit të presidentit amerikan Donald Trump.

‘Downing Street’ ka refuzuar të komentojë mbi këtë shkelje të sigurisë, e cila u raportua fillimisht nga Politico.

Politico raportoi se zyrtarët thanë që Burnham kishte komunikuar me personin që pretendonte se ishte Susie Wiles, “përpara se të lindnin dyshime se kontakti nuk ishte i ligjshëm”, dhe se ishin shkëmbyer vetëm “disa mesazhe”.

Një zëdhënës i qeverisë tha: “Ne nuk komentojmë çështjet e sigurisë kombëtare.”

Mësohet se komunikimi mes Burnham dhe personit që shtirej si Wiles ishte vetëm përmes mesazheve dhe se të dy nuk patën asnjë bisedë telefonike.

Burimet thanë se nuk ishin shkëmbyer “mesazhe me rëndësi” dhe se tekstet u “raportuan menjëherë tek autoritetet përkatëse” sapo u konsideruan të dyshimta.

BBC kishte raportuar më parë për një hetim të FBI-së lidhur me hakerimin e telefonit të Wiles në maj të vitit të kaluar.

Në atë kohë, Wiles tha se telefoni i saj ishte hakuar pasi një person, ose disa persona, që po shtireshin si ajo, kishin përdorur listën e kontakteve të saj për t’u dërguar mesazhe zyrtarëve të tjerë të lartë amerikanë.

Impersonimi kishte si objektiv telefonin e saj personal, jo telefonin qeveritar, por mes marrësve kishte senatorë amerikanë, guvernatorë dhe drejtues të lartë të kompanive.

Wiles, një aleate e rëndësishme e Trump, ishte gjithashtu ndër personat e shënjestruar në vitin 2024 nga një njësi spiunazhi kibernetik e lidhur me Gardën Revolucionare të Iranit, një degë e fuqishme e forcave të armatosura iraniane.

Në vitin 2024, Foreign Office (FCDO) konfirmoi se ministri i atëhershëm i Jashtëm britanik David Cameron kishte rënë viktimë e një telefonate mashtruese me një person që pretendonte se ishte ish-presidenti ukrainas Petro Poroshenko.

Lord Cameron gjithashtu kishte shkëmbyer disa mesazhe me tekst me personin që shtirej si Poroshenko, i cili ishte president i Ukrainës nga 2014 deri në 2019.

Gjatë periudhës së tij si kryeministër, Lord Cameron kishte pasur kontakte të shumta me liderin ukrainas, përfshirë takime në samite ndërkombëtare.

FCDO tha se publikoi detajet e shkëmbimit të mesazheve nga frika se ato mund të “manipuloheshin”.